Ихь уьлкейин Президент Владимир Путиндин 2023-пи йисан 22-пи ноябриъ 875-пи нумрайиккди удубчIву указдиъ улубкьнайи цIийи 2024-пи йис Хизандин йис вуди улупна.
Гьарсар касдиз жвуван хизан варитIан юкIв кабсру, кIваз мани ва багьалу инсанар айи макан ву. Ихтибарнан гьисснан ва жвуванурихъанди юкIв убгру хизанвалин ирснан далу хъайи касдиз саб ляхин-карнахьанра гучI даршул.
Газатдин машариъ цIийиди ачмиш апIурайи «Аьхю хизан – аьхю шадвал» рубрикайиккди учу кми-кмиди Табасаран ва Хив райондин гъуларин аьхю ва баркаллу хизанарикан бикIидича. Магьа Хив райондиъ айи ич мухбир Мейлан Нежефовдин гъийин макьалайиъ гаф-чIал хъугъвал заан дережайиан дибиснайи Ханзада Абаевайин хизандикан гъябгъиди.
Хив райондин Гъвандккарин гъул аьхю гъуларикан саб ву. Му гъулаъ йицIишубур «Игит дада» ччвур тувнайи хизанар айи. Гьяйифки, дурарикан гъи имбур сар Ханзада Абаева ву. Дагъу чан уьмрин юлдаш Бакар Мизаховичдихъди 11 велед (6 бай ва 5 риш) дюрхну, арайиз адагъну.
Вари аьдати табасаран дишагьлийириси, Ханзадайира, чан уьмрин варитIан ужубсиб вахт ихь халкьдин фурс ва дамагъ вуйи халачйириз бахш гъапIну. Гъулан фабрикайиъси, багъри хулаъра, накьдизкьан дугъан дуркьар-мухьариз архаинвал фтиз кIурушкьан аьгъдайи. Хъа уьмрин юлдаш Бакар гъулаъ машиндихъ хъади, хъа арабир Краснодар областдин аьтрафариин лихуз гъягъюри-гъюри, мадар апIури гъахьнийи. Гьамци баркаллуди хъапIу 41 йисандин арайиъ Абаевари йицIисар велед гъюрхну ва эвленмиш гъапIну. Гъи дурарин веледар, хизан-кюлфетдин эйсирси, чпира абйир-бабар духьна.
Гьяйифки, Ханзада бабазси, Абакар абайиз 33 хтул ва 12 гудул ккарцру йигъар кьисмат гъахьундар. Вушра, аьхю хизандин тIяаьм гьисс апIурайи Ханзада баб уьмрикан ва Худайикан гизаф разиди ву. Дугъан веледарикан гъи Ватан уьбхру гъуллугънан буржи тамам апIурайидарра а. Гьаци, Гьясратли Украинайин аьтрафариин гъябгъюрайи хусуси метлеб айи дявдин операцияйиъ игитвал улупура.
Гьич шак адар, Ханзада Абаева чаз тувнайи «Игит дада» ччвурназ вари терефарихъанди лайикьлу ву. Гъит яв хулаъ гьарган манишнан ялав ибшри, Ханзада баб!
