Наргиз Гюлечова
Дагъустандин Глава Сергей Меликов цци республикайиъ 155 йис къайд апIурайи шаир СтIал Сулейман бабкан гъахьи ва дугъан ччвур тувнайи райондиз гъушну. Дина гъягъбан асас метлеб – муниципалитетдиз гъюрайи инвестицйирихъди, артмиш шулайи гъулан мяишатдин ва туризмдин циркларихъди таниш хьуб вуйи.
Сабпи нубатнаъди республикайин кIулиъ айир, райондин Орта-СтIал гъулаъ 3 миллиард манат инвестицйир харж дапIну, 5 агъзур квадратдин метрин йишв ади яратмиш апIурайи сагъ апIбанна сагъламвал уьбхбан «Кпул-Ятар» центрин тикилишчивалин ляхнар фици кIули гъягъюраш, лигуз гъушну. Му центр мани штар гъюрайи ва сагъ апIуз кюмек тувру батIур айи жилариин диврайиб ву. Гьамусяаьт мушваъ гьелелиг жилин ляхнар гъягъюри ими.
Къайд апIуб лазим вуки, центр яратмиш апIбан серенжемарин дахилнаъди, 80 дахъру йишвар айи гостиницара, жа-жаради вуйи бицIи хуларра тикмиш апIиди. Проект 2027-пи йисан ачмиш апIуз планламиш дапIна.
Мидланра гъайри, республикайин глава райондиъ деврин тIалабариз жаваб тувру ва инвестицйирин бинайиинди тикмиш апIурайи «АлиЯк» йиккунна никкдин фермайизра гъушну. Му фермайиъ эвелиан кIарар дюрхну, дурар аьхю дапIну, хъасин, хюнар гъахьиган, дурар автомат жюрейиинди ккудузну, ккудубзу никкдин ва гъуркку маларин йиккун сурсат гьясил апIру проект дюзмиш дапIна. Проектдин дахилнаъди гьамусяаьт республикайин социальный идарйириз гьапIрайи 3 тонна никк суткайин арайиъ гьясил апIру ферма ляхник кипна. Багарихьди душваъ гьясил апIурайи никкун кьадар 8 тоннайиина за апIуз планламиш дапIна.
Мидланра гъайри, му фермайиъ суткайин арайиъ 60 тонна мал-къарайи ипIру аьдати вуйи сурсатар ва 5,5 тоннайин чру сурсатар гьясил апIура. Му кьадар мал-къарайи ипIру сурсат гьясил апIувал ихь уьлкейин рекорд ву.
Мушваъ гьацира мал-къара убккру йишвра либхура, душваъ суткайин арайиъ 10-дихьна кIару малар ва 40-рихьна чарвйир урккура. КIарар ва 400 ккудузру хюнйир аъру йишварин тикилиш’валин ляхнар давам шули ими.
Му инвестицйирин объектдиина душну имиди, Сергей Меликовди дурар тикмиш апIурайи меценат Фируза Керимова (думу сенатор Сулейман Керимовдин хпир ву) РД-йин варитIан заан пешкеш – «Дагъустандин улихь улупурайи хъуркьувализ лигну» ордендиинди лишанлу гъапIну ва республикайиъ кIули гъягъюрайи ляхнариъ жанлуди иштирак хьувализ дугъаз чухсагъул гъапну.
