Зубайдат Шябанова

27-пи мартди Табасаран райондин Хючна гъулаъ Хюрикк, Мягьрягъ ва ТинитI гъуларин амбулаторйириз цIийи машинар тувбаз бахш дапIнайи серенжем кIули гъубшну. Транспорт Дагъустандин гьюкмин кIулиъ айидари республикайин «Сагъламвалин сабпи звенойин модернизация» программайин дахилнаъди жара гъапIуб вуйи. Машинар медицинайин тяди кюмек тувуз уч дапIнайи материалар вахтниинди лабораторияйиз хуз ва духтир иццру касарихьна гъахуз ишлетмиш апIиди.

Амбулаторйирин кIулиъ айидарихьна жюлгер туври, райондин глава Мягьямед Къурбановди, райондин аьзарлуйириз сабпи нубатнаъ кюмек туврайидар ФАП-ариъ ва амбулаторйириъ лихурайидар вуйиб кIваин гъапIнийи. «Поселенйириъ амбулаторйири швнуб-саб гъулан агьалйириз гъуллугъ апIурайивал гьисабназ гъадабгъну, гьаму транспортди дурариз медицинайин кюмек вахтниинди рубкьуз аьхю мумкинвал тувди», – гъапнийи дугъу.

Дугъриданна, гьаци ву. Мисалназ Хюрккарин амбулаторияйиз «сельсовет Хурикский» поселениейин дахилнаъ айи 5 гъулан жямяаьт илтIикIура. ТинитI гъулан администрацияйин дахилнаъ айи ТинитI, Туруф, ФуркIил гъуларилан гъайри, амбулаторияйиз кюмек ккун апIури, Бургьанкент администрацияйиз дахил шулайи Бургьанкент ва Хюряхъ гъуларин агьалйирра гъюри шулу. Хъа Мягьрягъна Гелинбатандиъ тяди кюмек тувру гъуллугънан машиндиз ухдитIан игьтияжвал айи.