Зубайдат Шябанова
Гьаму йигъари Дагъустан Республикайин 2010-2011-пи йисари бабкан гъахьидарин арайиъ гъушу волейболин талитариъ Табасаран райондин бицIидаринна живанарин спортдин мектебдиъ урхурайидар кьюбпи йишван сагьибар гъахьну.
Табасаран райондин ДСЮШ-дин волейболин мектебдин директор ва тренер Садикь Уьсмановди ич сюгьбатнаъ къайд гъапIганси, живанарин арайиъ республикайин этапдин талитар мартдин 16-17-пи йигъари Мягьячгъала шагьриъ «Труд» стадиондиин кIули гъушну.
«Талитариъ республикайин жа-жара терефариъ гъалиб гъахьи 6 волейболин команда иштирак гъахьну. Дурар Табасаран, Дербент, БотIлих, Хунзах районариан, Мягьячгъала ва Буйнагъск шагьрариан вуйи. Асас талитар хьайиз сифте вари командйир кьюб дестейиз жара гъапIну. Ихь дестейиз Табасаран, БотIлих ва Мягьячгъала дахил гъахьну. Ихь спортсменар, БотIлихдиин 2:1, хъа Мягьячгъалайиин 2:0 гьисабниинди гъалиб духьну, сабпи йишв’ина удучIвну. Полуфиналиъ Хунзахдин командара 2:0 гьисаб ади ккагъну. Финалиъ БотIлихдин командайихъди талитназ удучIву ихь спортсменар, сабпи ражариси гьамусра дурариин гъалиб хьпак миж кади, сацIиб буш гъахьнийи, натижайиъ БотIлихдин спортменар улихь гьудучIвну. ИкибаштIан, чпи гъалиб дархьиган, ихь баяр сацIиб пашман гъахьнийи. Хъа му живанарин спорт ву, мушваъ хъуркьуваларра, магълубваларра шули аьдат ву. Гьаму талитариъ иштирак хьуб узу ихь баярин гъалибвал вуди гьисаб апIураза, фицики дурар, чпин яшариз дилигди, гъи республикайиъ живанарин арайиъ варитIан ужудар волейболистарин гьисабнаъ а», – гъапнийи Садикь Уьсмановди.
Тренери гьацира райондиъ гьамусяаьт 2008-пи йисан бабкан гъахьидарин ва исина яшарин живанарин арайиъ волейболин Лигайин уйнамишар гъягъюрайибдикан гъапнийи. Думу талитарин финал майди шулу.
Гьацира Хянягъ гъулан мектебдин волейболин команда райондин мектебарин лигайиъ 12 командайин арайиъ гъалиб гъабхьну. Апрель вазли думу гъулан мектебдин команда Кьибла Дагъустандин талитариъ иштирак шулу. Му терефнак Агъул, Ахцегь, Дахадаев, Дербент, Докъуз-пара, Гъяйтагъ, Къурагь, Мягьярамкент, Рутул, СтIал Сулейман, Табасаран, Хив районар, Дагъустандин Огни ва Дербент шагьрар кахьра. 22-пи апрели Хянягъ гъулан команда гъалиб гъабхьиш, жигьил спортсменар республикайин талитариъра иштирак хьиди.
Ихь командайиз хъуркьувалар ккун апIурхьа.
