Наргиз Гюлечова
Мягьячгъалайиъ жюрбежюр сагъ апIуз даршлу уьзрариан иццурайи бицIидариз нубатнан ражари рягьимлувалин серенжем кIули гъубшну. Думу баркаллу ляхин «Дианайихъди кюмек апIин» проектдин дахилнаъди тешкил гъапIур ихь ватанагьли Диана Уьсманова ву. Серенжемдиъ республикайин Халкьдин Собраниейин депутатари, жямяаьтлугъ касари, спортсменари ва гь.ж. иштираквал гъапIну.
Диана Уьсмановайи «Табасарандин нурар» газатдиз туву мялуматариинди, аьзарлу бицIидарин ва дурарин дадйирин юкIв шад апIру му мярака «Саб вуйи Урусат» партияйин Дагъустандин отделениейина, Урусатдин боксдин федерацияйин кIулиъ айи Уьмар Кремлевдин кюмекниинди кIули гъубшну. Рягьимлувалин серенжемдиз удучIвурайи вари харжар Уьмар Кремлевди чаина гъадагъну.
«7-пи августди Мягьчягъалайиъ айи, серенжемар гъахру «Королевский дворец» дараматдиъ нубатнан ражари онкология, аутизм, Даундин синдром, ДЦП, буллёзный эпидермолиз (бабочка) ва хъанара жара уьзрариан иццурайи бицIидарин ва дурарин дадйирин гевюл цIиб ачухъ апIуб ният вуди, 500-тIан артухъ инсанар уч дапIну, мярака кIули гъубхунча.
«Дианайихъди кюмек апIин» проект уьмриз кечирмиш апIури, цци магьа 8 йис ву. Гьар йисан швнуб-саб жюрейин серенжемар кIули гъахурача.
Гъагъи ва сагъ апIуз читин уьзрар кайи гизаф кьадар бицIидар уч апIури, дурариз серенжемар тешкил апIуб, вуйибси дупну ккунду, думукьан рягьти ляхин дар. Гьаддиз дурар кIули гъахуз узуз волонтерарира кюмек апIура», – ктибтура Дианайи.
Му ражари рягьимлувалин серенжемдиз дих дапIнайи буллёзный эпидермолиз уьзриан иццурайи баяр-шубарихьди шиклар зигуз гъитну, серенжемдин дахилнаъди гьадму шикларин аукционра кIули гъубхну.Дупну ккундуки, буллезный эпидермолиз гизаф гъагъи уьзур ву. Дидихъди аьзарлу духьнайи бицIирин хамраз, шириш кайи перде айи гьендемариз кIешар йивуру, хам лап назук шулу, саб бицIиди дидик кубкIиш вая дидиз илзигиш, хам тIубкIуру, зиян шулу.
«Му иццрушин кайи бицIидар айи хизанарин гьаммишан гизаф харжар шула, гьаз гъапиш дурариз лазим вуйи дармнар ва табии дару хам гизаф багьайиндар ву. Гьаддиз, гьацдар бицIидар айи хизанариз цIибди вушра кюмек ибшри кIури, аьзарлу бицIидарикан вахт ккимиди шиклар зигуб ва чпихьди дурар серенжемдиз хьади гъюб ккун гъапIнийча. Думу шиклар, серенжем гъябгъюри имиди, гьадушвахь аукцион дапIну, масу тувнийи ва пул дишлади бицIидарихьна гъурубкьнийи.
Саспидарин хиял гъабхьну, аукцион дубхну уч гъапIу пул узу мяракйир гъахру залихъ ва гьязур гъапIу ипIру сурсатарихъ тувну кIури. Думу дици дар. Вари харжар Уьмар Кремлевди ахьну. Аьхю вуйи чухсагъул чаз», – аьлава гъапIну Диана Уьсмановайи.
