Гюльнара Мягьямедова
Мягьячгъала шагьриъ АЗС-диин гъабхьи пашман гьядисайихъди аьлакьалу вуди, вари республикайиъ машинарихъ убгруб хъубзру станцйириъ хатIасузвалин къайдйир фици тамам апIураш, ахтармишар гъахура.
Дагъустандин Глава Сергей Меликов 17-пи августдиъ му ва жара аьхиримжи йигъари республикайиъ гъахьи чарасуз дюшюшарин натижйир йивури, агьалйирихьна илтIикIну: «Ухьуз варидариз ццийин августдин ваз кьаназ кIваинди гъубзди. Дагъустандиъ хъана чарасуз гьялнан дюшюшар гъахьну. 17-пи августдиъ гвачIнинган сяаьт 6-диъ «Кавказ» федеральный трассайин 848-пи километриъ Къарабудагъкент райондиъ «Хонда» машин хъапIрайир гъаншарди машинар гъюру рякъюз удубчIвну, гъагъ ади гъюрайи фура-йихъ хъубсну. Машин хъапIрайирин вижнасузвалиан 4 кас уьмрихъ мягьрум гъахьну.
Рякъярин гьяракатнан къайдйир тамам апIувал важиблу ву. ГьапIуз вуш инсанари, чпиз фукIара хьибдар кIури, ахмакь ляхнар апIуру. Ичв ва ичв багахьлуйирин, учвуз таниш дару инсанарин уьмрар кур апIуз шли ихтияр тувунчвуз? Жигьиларихьна илтIикIураза. Компьютерарин тамшйириъси уьмриъ аьжалсуз инсанар адар.
Кьюбпиб, цIа кабхъбан хатIалувал айи тяминатар ишлетмиш апIувалин важиблу къайдйир. Ахиримжи вахтнаъ цIа кабхъувалин швнубна-саб дюшюш духьна. Дурарикан саб – Дербентдиъ пашманди ккудубкIну. Гъи магьа хъана гизаф инсанар айи хуларик цIа кабхъна: 70 кас хулариан адаъну, 15 касдиз удучIвуз кюмек тувну. Бахтнаанси, сагъламвализ зарар гъабхьидар адар.
Дюшюшар арайиз гъафи йишв’ин гьяракатниинди кюмек тувру, къанун уьбхру гъуллугъари ляхин апIура. Зарар дубхьнайидариз кюмек тувра.
Нубатнан ражари дагъустанлуйирикан хатIасузвалихьна жавабдарвалиинди янашмиш хьувал ккун апIури илтIикIураза. Газдин тяминатар диврушра, электричество хъибтIрушра, рякъюъ машинарин улихьна удучIвурушра, учву, ичв багахьлуйир, гъуншйир, ватанагьлийир хатIайихьна маханай. Мягьячгъалайин гъирагъдиъ дубхьнайи пашман гьядисайикан гъагъи дарс дубхьнахьуз, гьаддикан магьарханай», – гъапну Республикайин Главайи.
Сергей Меликовди ватандашарин гъуллугъар тамам апIру, инсандин уьмриз, сагъламвализ хатIа кайи вари объектар ахтармиш апIувал ккун гъапIну. «Агьалйирикан, жямяаьтлугъдикан йиз теклифнан тереф бисувал ккун апIураза. Руш’ватар туври, хулар тикмиш апIуз къанунсуз къарарар адагъру, «зеленкйир» гьязур апIру вахтар гъушну», – къайд гъапIну дугъу.
Республикайин Главайи гъапиганси, бизнесди къанундиинди ляхин апIбахъна хувализ, сарихьанра манигъ’вал апIуз хьибдар. «Варидарикан къанунди тувнайи къайдйириинди ляхин апIувал ккун апIураза. Чпиз манат туврудариз саб жюрейинра шартIар арайиз дархиди, варидариз артухъси пул жибаъ ивуз ккунда», – гъапну Сергей Меликовди. Дугъан фикриинди, Дагъустандин экономикайин гизаф цирклариъ инсанарин гъуллугъар лазим вуйи къайдайиинди гьуркIрадар.
Кьибла Сухокумск
15-пи августдиъ Кьибла Сухокумскдиъ муниципалитетдин глава Сеидягьмед Мамадовдин регьберваликкди аппаратдин совещание кIули гъубшну. Совещаниейиъ шагьрин округдин аьтрафариин ерлемиш духьнайи машинарихъ убгруб хъубзру вари станцйир ахтармиш апIуз къарар адабгъну. Дидин гьякьнаан Кьибла Сухокумск шагьрин администрация-йин мялуматарин гъуллугъну хабар тувра.
Заседание Мягьячгъалайиъ АЗС-диин цIа алабхъну, тIубкIувалин натижайиъ гъийиху инсанарин гьюрматназ саб дакьикьайиъ ккебехъну гъузбалан башламиш гъапIнийи. Гьял апIбан бадали адабгънайи асас месэла – шагьриъ айи АЗС-ари хатIасузвалин къайдйир тамам апIураш-адарш ахтармиш апIбан табшуругъар тувувал вуйи.
Табасаран райондиъ
Табасаран райондин глава Мягьямед Къурбановди муниципалитетдин аьтрафариин али СТО-йин ва АЗС-арин ляхин ахтармиш апIуз табшуругъар тувну. Дидин гьякьнаан 15-пи августдиъ Табасаран райондин администрацияйиъ кIули гъубшу аппаратдин совещаниейиъ къарар адабгънийи.
Муниципалитетдин главайи къайд гъапIганси, техника жигьатнаан гъуллугъар гьуркIру станцйириъ, машинарихъ убгруб хъубзру станцйириъ цIа кабхъувалин хатIасузвалин къайдйир уьрхбан, дурарин гьюкуматдин къайдйириз асасвал ахтармиш апIувал чарасуз дапIну ккуни ляхин ву.
Совещаниейиъ гьацира, августдин вазлин аьхириъ гъабхру совещаниейиъ чарасуз гьялнан дюшюшар арайиз гъафиган (хулаъ газдик цIа кабхъиган, электроэнергияйихъди тямин апIувалин месэлйир арайиз гъафиган ва гьацдар жарадар), дурар гьял апIбан рякъярин суаларра арайиз адагъувал планламиш гъапIну.
