Гюльнара Мягьямедова
Дагъустандин Глава Сергей Меликовди машгьур шаир Расул Гьямзатов бабкан духьну I00 йис тамам хьпан юбилейиз гьязурлугвалар гъахру тешкиллувалин комитетдин заседание уч гъапIну. Юбилейихъди аьлакьалу асас серенжемар Мягьячгъалайиъ, Москвайиъ, Санкт-Петербургдиъ, Минскдиъ, Бакуйиъ, Бишкекдиъ, Ташкентдиъ кIули гъягъиди.

Мягьячгъалайиъ литературайин фестивалар, халкьдин ва художествойин яратмишарин фестивалар, музыкайинна театрин литературайин сягьнйир ва гьацдар жара проектар планламиш дапIна.
Варихалкьарин Гьямзатовдин фестивалиъ жюрбежюр уьлкйириан вуйи литературайин 55 вакил иштирак хьиди. Дурар Мягьячгъалайиъ, Хунзахдиъ, Дербентдиъ гъягъру серенжемариъ иштирак хьувал планламиш дапIна..
Дагъустандин шагьрарин ва районарин ачухъ майднариъ сягьнйир, яратмишарин коллективарин концертар, шаирарин флеш-мобар кIули гъягъиди. Юбилейин йигъари Мягьячгъалайин Расул Гьямзатовдин ччвурнахъ хъайи кюче машквран асас майдан хьибди.
Шаирин багъри Хунзах райондин ЦIада гъулаъ Гьямзатдин ва Расулин хулаъ айи пичраан цIюмгъял гъадабгъну, «Лизи къарнйир» мемориалин комплексдиин гьарган кабхьну убгурайи цIихъна хибди ва гьадушвахь цIа кабхьди.
Гьацира, Расул Гьямзатовдин яратмишариз бахш дапIнайи бабан чIалариинди вуйи тотальный диктантар кIули гъахиди. Москвайиъ М.И. Рудоминойин ччвурнахъ хъайи харижи уьлкйирин литературайин Вариурусатдин гьюкуматдин библиотекайиъ художествойин ва документальный фильмар, шаирихъди вуйи сюгьбатар улупиди, китабарин выставкйир гъахиди. Дагъустан лишанлу апIру милли алатарин, Расул Гьямзатовдин юбилейиз гизаф чIалариинди чапдиан деетнайи эсерарикан ибарат вуйи китабарин выставкйир, шаирин шиърар урхувалин серенжемар ва «Лизи къарнйир» акция гъабхувал планламиш дапIна.