Умганат Сулейманова
Дадайин йигъаз бахш вуйи машквран гъаншариъ республикайин вари районариъ ва шагьрариъ хусуси метлеб айи дявдин операцияйиъ иштирак шулайи ва гьацира душваъ гъийиху эскрарин бабарихъди, хизанарихъди вуйи серенжемар тешкил гъапIну. 30-пи ноябри Дагъустандин Огни шагьриъ мициб рягьимлувалин серенжем «Атика» залиъ, хъа Дербент райондиъ «Уллучай» ресторандиъ диндин вакиларин, жямяаьтлугъ ва рягьимлувалин тешкилатарин кIулиъ айидарин иштираквалиинди кIули гъушну.
Дагъ. Огни шагьриъ серенжем тешкил гъапIур шагьрин глава Замир Гьяжимурадов вуйи. Му касди аьхиримжи вахтна, хусуси метлеб айи дявдин операцияйиъ иштирак шулайи ва думу женгариъ гъийиху эскрарин хизанариз, бабариз артухъ фикир туври, кми-кмиди гьаму жюрейин мяракйир, серенжемар гъахура, эскрарин хизанариз яшайишдиъ читинвалар арайиан адагъуз кюмек тувра.
30-пи ноябри гъабхьи серенжем, уч духьнайидари, гъийиху эскрарин яс уьбхюри, саб дакьикьайиъ ккебехъувалилан ккебгънийи. Хъасин Замир Гьяжимурадовди дишагьлийир Дадайин йигъахъди тебрик гъапIнийи.
«Гьюрматлу бабар, гъийин ичв машквар кIваантIан мубарак апIурача. Гъи учвухьна вуйи гьюрмат лап аьхюб вуйич. Украинайиъ гьябгъюрайи хусуси метлеб айи дявдин операцияйиъ иштирак шулайи ва гъахьи баяр тербияламиш гъапIу абйир-бабариз аьхю чухсагъул мялум апIуз ккундузуз. Гирами бабар, дишагьлийир, гъи ихь Ватан уьбхювалик аьхю пай киврайидар учву вучва. Юкьур табасаранлу «Урусатдин Игит» ччвурназ лайикьлу гъахьну, дурарикан сар – йикIбан кьяляхъ. Дурарин игитвал жигьил наслиз ватанпервервалин тербия тувбан ляхниъ нумуна ву. СВО-йин женгариъ айи ихь эскрарин ва дурарин хизанарин гъайгъушнаъ хьуб ич вазифа ву. Ич терефнаан учвуз ва ичв хизанариз вуйи кюмек апIуз гьаммишан гьязур вуча, гьяйифки, учлан асиллу дарди гьял апIуз даршлу месэлйирра шулу. Гирами бабар, сабур тувричвуз Аллагьди, аьхю чухсагъул учвуз», – гъапнийи шагьрин кIулиъ айири чан улхбаъ.
Дербент райондиъ «Уллу-чай» ресторандиъ Дадайин йигъаз бахш вуйи мярака тешкил гъапIур ва кIули гъубхур Дагъустан Республикайин муфтиятдин кьибла терефнан дишагьлийирихъди ляхин гъабхурайи идарайиз регьбервал туврайи Хадижат Асланова вуйи. Дупну ккундуки, гъи муфтиятдин терефнаанра хусуси метлеб айи дявдин операцияйиъ айидарин хизанариз, бабариз хайлин кюмек тувра.
«Баб дишагьлийир, гьякьикьатдиъ учву кьувватлудар вучва, жиларихъди сатIиди вари ляхнарин артмиш’валик учвура аьхю пай киврачва. Бабарин адресназ гизаф уччвудар гафар пуз шулу. Машкврахъди тебрик апIури, учвуз ва ичв багахьлуйириз гележегдиъ ислягь йигъар, хушбахтвал, шлубкьан ухди гъалибвал гъадабгъну, ичв багахьлуйир хизанарихьна гъюб ккун апIураза. Гъит, гьарсар бабан кIваз архаинвал бихъри, учвуз ярхи ва бахтлу уьмур, вари ляхнариъ хъуркьувалар ишри», – гъапнийи Хадижат Аслановайи, уч духьнайи дишагьлийир машкврахъди тебрик апIури.
Дадайин йигъахъди серенжемдиз дуфнайи бабар ва хизанар Дербент райондин администрацияйин главайин заместителари, райондин собраниейин депутатари, гъуларин поселенйирин главйири тебрик гъапIну. Вари дишагьлийириз, бабариз кюкдин кунцIар ва жара пешкешар тувну.
