Мейлан Нежефов
Абйирин мисалнаъ дупна: «Гъунши ужур гъахьиш, кечел ришра швуваз гъягъюру». Дугъриданра, гьаци хьузра ву. Раккниин жвуван хайир ккуни гъунши хьуб гьарсар касдин мурад-метлеб ву.
Гьациб юкIв мухриъ ивну, узуз даккниб гъуншдизра ккун дарапIарза дупну, дугъан шадвалин ва хажалатнан, сумчрин ва саламдин хайир-шейир жвувандарси гьисс апIру гъунши багахь хьайириз, валлагь, фуну ляхин-каризра думу ярхлаъ айи чветIан зиина ва бакарди шулу.
Гьякьлу, вафалу гъунши ва дуст алахъувал инсандин кьисмат ву, хъа думу уьрхювал, чвеси вая чиси дисувал, ккун апIувал – инсандин бахт! Жвуван далу уьбхру, уьмрин шад ва пашман геренариъра увухъди шлу кас айивал – мутIан аьхю савкьат шулинхъа? Ваъ. Диди чан гьякьлу лишан ва сурат лазим вуйи дакьикьайиъ яракар хьувалиинди улупуру.
Гьадму саб вахтна убгру игниъра, убхру халачайихъра, ктарчру келфер-мурсларихъра, ккадабгъру хяраъра, убжру уьлихъра гьарган сабси хъади шлу ва бязи ляхнар сабишв’инди кюмекниинди апIури шлу гъуншйирин сирнакан чпин жикъи ва мяналу кьатI’и жавабариинди исихъ ктибтураза.
«Валлагь, сарира жилилан гъабхруб фукIара адар. Эдеб-намуснан къайдйирин баркаллагь гъадагъуб ихь ата-бабйирин халис лишнарикан саб вуйи. Хъа думу зяя апIбаз саб дакьикьара бес ву. Гьаддиз уьмрин мяна жвув’ин жан илмиди, сар-сариз ккюргъну, аьхюр аьхюрси, бицIир бицIирси дидисну, арайиъ гьякь-гьюрмат ади ва жвуван аьхиримжи йигъазкьан хъугъвал алди ликар алдагъбаъ рябкъюразуз. Гьаму узу гъапи гафарин терефкрар вуйи, сар-сарин гъадри айи, сар-сарин гъаври шлу гъуншйир вуча», – кIура Мажвгул гъулан агьали Периханумди.
Дугъан улхуб давам апIури, Назперийира гьамци гъапнийи: «Гуж гъабхьиган, юртран ккумра жилиз гъябгъюру. Бабарин ирс гъянаъ айиган, гьамци 40 йистIан артухъ саб йишв’ин гаф-чIал апIуз, хатир-гьюрмат уьбхюз ва уьл ипIуз шули ачухьан. Жвуван хайир-шейриъ жвувси иштирак шули, юкIв убгури, ликар алдагъру мурар йиз багахь хьайиган, ляхнарихьан саб артухъ гучI ва гъайгъу кади шулдариз. Мицистар гъуншир раккниин хьуб аьхю бахт вуйиз».
«Увуз – жвугъри, узуз – мишмиш дарпиди, увуз айиб узуз гьаз адар, узу увуз гъапIубдин, тувубдин гьацIсибкьан гъапIундарва узуз, накь узу увухьна гъафунза, гъи уву узухьна гъач – гьамцдар гафар-чIалар арайиъ ади гъабхьиш, икибаштIан, думу гъуни-гъуншивал дар, хъа анжагъ жара кас чан мянфяаьтназ ишлетмиш апIру саягънан къайда ву. Гъунши ужур хьпан бадали сифте дугъаз жвув ужур духьну ккун. Уж’вал дапIну, гьюлиъ ипиш, гьадушваъра дудрубгур. Гъуншдихъди алдабгъру лик, апIру гаф-чIал ва хайир-шейир кьюбиб терефаризра мясляаьт уьбхруб ва кIули гъабхру бахт кайиб вуйич. Баркаллу гъуншивалин жини сирра магьан гьамдиъ айич», – натижа гъивнийи Багьаратди.
Шиклиъ: улдукьу гъуншйир Периханум, Назпери ва Багьарат, Мажвгул гъул
