Билих, чанта, гьюрбйир, тавра, талис, чIюлкьям… – улихьган ихь бабари дуланажагъдиъ лазим шлу му шей’ар магазнариан масу гъадагъури шулдайи, хъа жвуван хилариинди дирхуйи. Гизафси ирин парчайикан дапIнайи дурар хайлин вахтна ишлетмиш’валиъ гъузуйи. Ярхлаан гъюру далдабуйин сес уччвуди ебхьуру, кIуруганси, ихь дишагьлийири, жара халкьарин вакилари дапIнайи шей’арихъ хъергну, гья-йифки, му сяняаьтра марцциди гьархну.

Вушра, гьелелиг ихь халкьдин арайиъра жвуванубдин гъадри кайи инсанар ами. Гьадрарикан сар Хив райондин Мажвгларин кьялан мектебдиъ лихурайи мялим Назила Батирова ву. Дугъаз уткан халачйир, кюмсер, гьалвар, дорожкйир урхбан вари сирар аьгъя. Хъа аьхиримжи вахтари Назилайи гьамус кIваълан гъябгъюрайи ихь бабарин улихьдин сяняаьт – дуланажагъдиъ лазим шлу таврийир, чантйир, билхар дирхувал – цIийи алапIуз, дидиз кьюбпи уьмур тувуз чарйир агура. Гьелбетки, му ляхни хилиз кепекра хура – райондиз гъюрайи туристари дугъу гъидирху шей’ар аьшкьниинди масу гъадагъура.

Ягъур ибшри увуз му баркаллу ляхниъ, Назила Тажутдиновна!