Гюльнара Мягьямедова,
Мейлан Нежефов
13-пи июнди Урусатди Украинайиъ гъабхурайи хусуси метлеб айи дявдин операцияйиъ «Урусатдин Игит» ччвур гъадабгъу ихь ватанагьли, Хив райондин Зилдикк гъулан вакил, генерал-лейтенант Эседуллугь Абачев бабкан духьну 56 йис тамам гъабхьну.
1989-пи йисан Эседуллагь Абачевди Харьковдин гвардияйин танкарин заан командный училище, хъа 2002-пи йисан Урусатдин Федерацияйин Яракьлу кьувватарин Общевойсковой академия ккудубкIну.
Жюрбежюр йисари Эседуллагь Абачев мотострелковый дивизияйин танкарин 20-пи ротайин командирди, 78-пи бригада материаларихъдина техникайихъди тямин апIру гъуллугънан начальникди, полкнан командирди, мотострелковый жаради вуйи 19-пи бригадайин командирди, РФ-дин Яракьлу Кьувватарин 5-пи общевойсковой армияйин штабдин начальникди, Урусатдин Федерацияйин оборонайин министерствойин Дагъустан Республикайиъ айи вакилди лихури гъахьну.
Думу гьацира армянаринна азербайжанарин арайиъ гъабхьи гъалмагъалиъ, Чечен Республикайиъ гъабхьи кьюбпи дявдиъ, 2008-пи йисан Грузияйиъ гъабхьи дявдиъ, Сирияйиъ кIули гъубшу дявдин операцияйиъ иштирак гъахьну.
2021-пи йисан 18-пи мартди Урусатдин Федерацияйин Президент Владимир Путиндин Указдиинди Эседулла Абачевдиз генерал-майор ччвур тувну.
2022-пи йисан 24-пи феврали Урусатди Украинайиъ хусуси метлеб айи дявдин операция ккебгъган, Урусатдин Федерацияйин Президентдин ва Луганскдин халкьдин республикайин главайин сатIи вуйи указдиинди Э.Абачев ЛНР-дин халкьдин милицияйин армейский 2-пи корпусдин командующийди тяйин гъапIнийи.
2022-пи йисан 20-пи апрели ЛНР-дин главайин указдиинди Эседулла Абачевди улупу игитвализ ва кьягьялвализ лигну, дугъаз Луганскдин Халкьдин Республикайин Игит кIуру варитIан заан ччвур ва лишанлу апIру «Гъизилин хяд» тувну.
Украинайин Луганский область ихь эскрари бисбаз дилигну, 2022-пи йисан 4-пи июлиъ Урусатдин Президентдин указдиинди, Эседулла Абачевдиз Урусатдин Федерацияйин Игит ччвур, хъа 2023-пи йисан 17-пи феврали генерал-лейтенант ччвур тувну.
2024-пи йисан мартдин вазли Урусатдин Игит, генерал-лейтенант Эседулла Абачев Ленинградский военный округдин (ЛенВО) командующийин заместителди тяйин гъапIну.
КIваина хурача: Ленин-граддин военный округ 2024-пи йисан 26-пи феврали Урусат военно-административный йишвариз пай гъапIган, Урусатдин Президентдин Указдиз асас вуди арайиз гъафиб вуйи. Думу округдиз Карелия, Коми, Архангельский, Вологодский, Калининградский, Мурманский, Новгородский ва Псковский областар, Ненецкдин автономный округ ва Санкт-Петербург дахил шула. Гьацира тазади арайиз гъафи округдин дахилнаъ кафари флотра а.
РД-йин Глава Сергей Меликовди Ленинграддин военный округдин командующийдин заместитель, генерал-лейтенант Эседулла Абачев бабкан гъахьи йигъахъди тебрик гъапIну. «Гъагъи дюшюшари лигим дапIнайи жилижвуван хасиятну, мюгькамвали ва улихь дивнайи месэлйир хъуркьувалиинди тамам апIуз аьгъювали уву лишанлу апIура. Уву хусуси метлеб айи дявдин операцияйин варитIан читин кьикьнигъ гъизигу яв зегьметниинди машгьур шаир СтIал Сулеймандин гафар субут гъапIунва. «Душмандин мухриин дивуз гъагъи гъван, йиз уьлкейиъ душмандин машнаъ дийигъуз гьязур ву гьарсар кас», – С.Сулеймандин гафар гъахнийи республикайин Главайи чан тебрикнан улхбаъ.
Хив райондин МО-йин глава Ярмет Ярметовди Эседулла Абачев бабкан гъахьи йигъахъди мубарак гъапIну: «Уву, яв уьмрин аьхю тажрубайи, пишекарвалин дерин аьгъювалари, намуслувалиинди апIурайи ляхни, зегьметниин юкIв аливали гьюкуматдин кIулиъ айидарин, Яракьлу Кьувватарин офицерарин корпусдин ва халис эскрарин терефнаан гьюрмат гъазанмиш гъапIунва. Увуз мюгькам сагъвал, ярхи уьмур, марцци завар, Ватан бадали гъабхурайи гъуллугънаъ заан хъуркьувалар ккун апIурача», – гъибикIну Ярмет Ярметовди чан телеграмм-каналиъ.
Табасаран райондин глава Мягьямед Къурбановдира ихь игит Эседулла Абачев бабкан гъахьи йигъахъди тебрик гъапIну: «Ихь уьлкейин хъуркьуваларик ва хатIасузвал уьбхбак уву киврайи лайикьлу пайнакан дарпиди гъибтуз шулдар. Яв уьмрин рякъ игитвалин гьунарари ва Ватан бадали жан тувуз гьязур вуйивали абцIна. Уву кьягьялвалин, вафаллувалин лишан, аргъаж шулайи наслариз чешне вува, яв хъуркьувалари гьяйран апIуру. Эседулла Аьбдулмуминович, Табасаран райондин агьалйирин терефнаан яв бабкан гъахьи йигъ мубарак ибшри! Увуз мюгькам сагъвал, ярхи уьмур ва хъуркьувалар ккун апIурача!», – гъибикIну Мягьямед Къурбановди чан Телеграм-каналиъ.
Велед бабкан хьувал абайизна бабаз аьхю шадвалин гьядиса ву. Гьаддиз «Табасарандин нурар» газатдин журналист Мейлан Неджефов, Зилдикк гъулаъ убгъурайи тIурфниз дилигди, гъулан администрацияйин глава Аьбдулгьяким Гьюсейбеговра хъади, Эседулла Абачевдин дада Угълан халайихьна гъушнийи ва игит бай тербияламиш апIбаз редакцияйин терефнаан чухсагъулин гафар гъапнийи. Угълан Абачевайи чан терефнаанра ич журналистдин камерайиз чан балин бабкан гъахьи йигъ мубарак дапIну, учуз гъапи: «Йиз бай кIваин дапIну узухьна гъюбаз, учвуз аьхю чухсагъул! Фукьан веледар ашра, дадайиз дурар вари сабси багьалу ву. Гъит Первердигар Аллагьди ихь дюн’яйиъ ислягьвал дебккри, жигьилар сагъ-саламатди чпин хулариз кьяляхъ гъюри».
Угълан Абачева 1941-пи йисан Хив райондин Зилдикк гъулаъ бабкан гъахьну. Дугъан байвахт гъагъи Ватандин Аьхю дявдин йисариин алабхъну. Дявдин кьяляхъ йисарра читиндар гъахьну. Йисар бегьем гъахьиган, Угъланди чан гъула бай Аьбдулмуъминдихъди хизан ккебгъну. Угълан ва Аьбдулмуъмин Абачевари халис табасаран хизандиси 10 велед – ургур байна шубур риш тербияламиш гъапIну. Гъи дугъан баяр Эседуллагьди, Исабегу, Вадимди ва худул Арсенди (Эседуллагьдин бай) военный гъуллугънаъ Ватандин маракьар уьрхюри, чпин улихь диву месэлйир хъуркьувалиинди тамам апIура. Гъит ихь бабарин юкIвар гъарган шадди гъузри. Фицики, фунур бабазра чан веледдикан ккуниб – думу сагъ-саламатди, бахтлу уьмур хъапIри гъузуб ву.
