Наврузбег Керимов
ихь уьлкейиъ 25-пи март 2007-пи йисхъанмина культурайин гъуллугъчийин йигъ вуди къайд апIура. Багъри халкьдин культура уьбхбак ва артмиш апIбак лайикьлу пай киврайидарикан сар ихь ватанагьли Кузьмин Гьюсейханов ву. Культурайин цирклиъ лихури дугъан 25 йис ву. Гьамусяаьт дугъу Дагъустандин Огни шагьриъ культурайин хулаъ ляхин апIура – эстрадайин жюрбежюр алатариин мукьмар йивура, мяълийир дикIура, музыка дюзмиш апIура.
– Музыкайиин бицIи вахтнахъанмина машгъул духьнайир вуза. Узу Хив райондин Хив гъулаъ бабкан гъахьунзу. Йиз адаш Аьбдурягьман Акимович совхозарин агрономди гъилихур ву, хъа дада Къизайбат Аьлимурадовна хайлин йисари Хив райондиъ ЦРБ-йиъ бухгалтерди гъилихну. Дурар кьюридра уткан мукьмариин ва мяълийириин аьшкь алидар ву.
Адашдиз вари музыкайин алатариин мукьмар йивуз аьгъя, дада мяълийир апIуз ккунир вуйич. Гъира кIваинди имийиз, фици узу мектебдиъ урхурайи вахтари ич хизан райондин фестивалариъ иштирак шули гъахьнуш. Адашди каманча йивуйи, хъа дадайи, узу ва йиз кьюрид чйири мяълийир апIуйча. Дадайи райондин больницайиъ медицинайин гъуллугъчйирин йигъаз тялукь вуйи серенжемариъра мяълийир апIуйи шуйи. Искусствойихьна вуйи му гьевесну узузра, йиз чи, гъи мяълийирин устад духьнайи Руминайизра уьмур музыкайихъди аьлакьалу апIуз гъибтну. Хъа аьхюну чи Эльмара Москвайиъ айтIан уьзрарин духтирди лихура.
Узу, асас ляхнилан гъайри, Дагъустандин Огни шагьрин бицIидарин яратмиш апIбарин хулаъ музыкайин дарсарра кивраза. Гьар йисан узухь урхурайи бицIидари, республикайин дережайин музыкальный конкурсариъ иштирак шули, пешкешнан йи-швар гъадагъурайиз. Цци, мисалназ, Гъалибвалин 80 йис яркьуди къаршуламиш апIбан серенжемариъ Гъалибвалин машквраз бахш вуйи мяъли апIуз узухь урхурайи Рягьимов Юсуф гьязур апIураза, – ктибтнийи узуз Кузьмин Гьюсейхановди чан ляхникан.
Дагъустандин Огни шагьрин культурайин хулан директор Феруза Мягьямедовайи Кузьмин Гьюсейхановдин ляхниз заан кьимат тувра.
– Кузьмин Гьюсейхановди багъри культура уьбхбан бадали аьхю зегьмет зигура. Гьаммишан баяр-шубарихъди музыкайин кружокар гъахура, гьацира думу республикайиъ кIули гъягъру жюрбежюр фестивалариъ иштирак шула. Гъийин йигъаз узу дугъкан, дугъу апIурайи ляхникан гизаф рази вуза. Магьа саб вазлилан ич культурайин хулан гъуллугъчйири Гъалибвалин 80 йисаз бахш вуйи аьхю машквар тешкил апIиди. Музыкайихъди аьлакьалу вари месэлйир гьял апIурайир Кузьмин вуйич. Узу ва ич культурайин хулан коллектив мицир кас учухъди ляхин апIурайивалиин гизаф шад вуча. Мумкинвал ккабхъну имиди, Кузьмин Гьюсейханов ва узухъди сатIиди хайлин йисари лихурайи имбу гъарашугъар культурайин гъуллугъчйирин пишекарвалин йигъахъди мубарак апIураза, – гъапнийи Феруза Мягьямедовайи.
Кузьмин Гьюсейхановдин мялимвалин устадваликан, дугъан бицIидарихьна вуйи ккуниваликан саб-кьюб гаф Дагъустандин Огни шагьрин бицIидарин яратмиш апIбарин хулан директор Гьябибат Уьмаровайира гъапнийи.
– Кузьмин Гьюсейхановдин ДДТ-йиъ лихури 25 йис ву. Учухьна 750 бицIидар гъюра. Гьадрарикан 10 процент бицIидар музыкайиин аьшкьлу духьнайидар ву. Кузьмин Гьюсейхановдин хиликк урхурайи гизаф баяр-шубари, республикайин дережайин фестивалариъ иштирак шули, кми-кмиди гъалибвалин йишвар гъадагъури шулу.
Кузьмин Аьбдурягьманович ич мектебдиъ гьязур апIурайи вари мяракйирин улихь хьайи кюмекчи вуйич. Музыкальный инструментар лазим гъахьиш, вари тешкил апIиди ва чав хъюгънайи ляхин баркаллуди кIулиз адабгъиди. 2008-пи йисан РД-йин образованиейин ва илимдин министерствойи дугъан намуслу ляхин «РД-йин халкьдин образованиейин отличник» ччвур тувбиинди лишанлу гъапIну.
Мектебдин коллективдин терефнаан Кузьмин Гьюсейханов кIулиъ ади Дагъустандин Огни шагьрин культурайин хулан гъуллугъчйириз чпин пишекервалин машквар кIваантIан мубарак апIураза, – гъапнийи Гьябибат Уьмаровайи.
