Гюльнара Мягьямедова
Гьаму гирами Рамазандин вазлин аьхиримжи йигъари уьлкейин гизаф шагьрариъ лавландин сатIиди ушв гьибтувалин серенжемар кIули гъушну..
Уьлкейин цIийи регионарикан саб вуйи Донецкий областдин Мариуполь шагьриъ дявдин операцияйин натижайиъ даргънайи хулар-йишвар цIийи алаури, лихурайи Табасаран райондин Хянягъ гъулан вакил, ООФЦА компанияйин генеральный директор Вадим Аслановдин (шиклиъ) тешкиллувалиинди ва харжариинди ифтар кIули гъубхну. Серенжемдиз Мариуполь цIийи алапIурайи тикилишчйирихъди сабси хусуси метлеб айи дявдин операцияйин иштиракчйирра гъафнийи. Дурарин арайиъ Табасаран райондин ТIаттил гъулан вакил, Урусатдин варитIан жигьил Игит, капитан Руслан Къурбанов ва дугъан эскрар айи.
«Гьамци уч хьуз ухдихъанмина фикриъ айич. Мариуполь цIийи алапIбак пай киврайи тикилишчйир уч духьнача. Хусуси метлеб айи дявдин операцияйиъ иштирак шулайидарин гевюл цIибкьан ачухъ апIбак умуд кади, ихь эскраризра теклиф гъапIунча. Эгер гьамцдар серенжемар кми-кмиди гъахуйиш, гизаф ужуйи хьибдийи. Мушваъ ихь табасаранарси, аварар, даргйир, лакар, ингушар, таджикарра а. Гизафдарихьан, мажал адарди, мина гъюзра дубхьнадар. Вахт ими, дурарихъди жара вахтнаъ ифтар гъабхидича. Мицисдар серенжемари ихь эскрар сатIи апIуру. Узу тикилишчивалин компанияйин кIулиъ айир вуза, ляхин ужуди кIули гъабхурача. Тешкилатдиъ лихурайидар гизафси ихьдар ву, хъа СНГ-йин уьлкйирианра хайлиндар а», – гъапнийи Вадим Аслановди.
«Вадим Аслановди дявдин операцияйин иштиракчи баяриз лавландин ушв гьибтуз теклиф гъапIнийи. Гьамциб серенжем тешкил гъапIдариз чухсагъул мялум апIуз ккундузуз. Гирами Рамазандин вазли Аллагьу Тяаьлайикан дявдин женгар ухди ккудукIну, вари сагъ-саламатди чпин хизанарихьна гъювал ккун апIураза. СВО ккебгъайиз Донбассдин ругариин яшамиш шулайи ватанагьлийирикан цIибтIан хабар адайхьуз. Мушваъ табасаранар, дагъустанлуйир гизаф лихура. Багъри ругарихьан ярхлаъ айиган гьамцдар серенжемар кми-кмиди гъахуйиш, ужуди хьибдийи», – гъапнийи СВО-йин иштиракчи Рустам Къалабеговди.
«Узуз Мариуполиъ яшамиш шулайи ихь ватанагьлийир гирами Рамазандин вазлин йигъари чпин дибиснайи ушв гьибтуз уч хьувалин гъийин серенжем гизаф кьабул гъабхьунзуз. Вадим Аслановди серенжем вари аьдатар хъайи-хъайиси тамам апIури тешкил дапIнайи. Ихь халкьдин гъидису ушвар Аллагьди кьабул апIри, варидариз чухсагъул», – гъапнийи Руслан Къурбановди.
Мариуполь шагьриъ яшамиш шулайи Табасаран райондин Ругуж гъулан агьали Селимхан Мягьямеддовра ифтариз дуфнайидарикан сар вуйи. «Узу 1985-пи йисан Советарин армияйиъ гъуллугъ дапIну гъафир, Донецкдиъ советарин алверин институтдик урхуз кучIвну, 1989-пи йисан думу институт ккудубкIну, дишлади саб совхоздиъ кIулин экономистди лихуз хъюгънийза. Гьадму мяишатдиъ 26 йисан гъилихунза. Учу Новосирковский райондиъ яшамиш шулайча. Гъулазра дяви хъубкьнийи. Йивбарин, тIуркIру снарядарин сесерихъди, аквар адарди яшамиш хьуз читинди вуйи. Гъул ккидипнийи. Вахтниинди удучIвну гъягъюз хъуркьнийча. 2023-пи йисан июндин вазлиъ Мариуполиз гъафунча. Квартира пулихъ дибиснача. Йиз хпир Назимат Хянягъ гъул’ан ву. Учухъди ич сар ришра яшамиш шула. Дугъура Мариуполиъ ляхин апIура.
Украин чIалра, урус чIалра, багъри табасаран чIалра аьгъязуз. Учу Украинайин культурайиз гьюрмат апIури, ич терефназ дурарин терефнаанра гьюрмат ади яшамиш гъахьнийча. Хъа миллетчйир гъафиган, читинвалар алахьнийи. Тукандиъра кмиди украин чIал апIувал тIалаб апIуйи. Хъа учу ич кьиматлувалар дургундарча», – къайд гъапIнийи Селимхан Мягьямедовди.
Дугъриданна, гъи варитIан читинди дявдин операцияйин иштиракчйириз, Урусатдин цIийи регионариъ, Украинайин сяргьятарин багарихь яшамиш шулайидариз ву. Багъри ругарихьан ярхлаъ айидарин юкIвар шад гъапIу Вадим Аслановдин садакьа Аллагьди кьабул апIри. Гьаму гирами машкврин улихь йигъари ухьу Аллагьдикан дюн’яйиъ айи вари дявйир ккудукIну, ислягьвал дебккувал ккун апIурахьа.
Хъа эгер макьалайин игитарикан артухъси мялуматар гъадагъуз ккундуш, апрелин 8-пи йигъан удубчIву «Дагъустан» РГВК-йин табасаран чIалниинди вуйи «Мил» передачайиз ютубдиъ лигуз шулучвхьан.
