Зубайдат Шябанова

Гьаму йигъари РД-йин глава Сергей Меликовди дагъустандин баяри гъуллугъар гъахурайи жюрбежюр военный частарин кIулиъ айи командованиейихьан швнуб-саб чухсагъул мялум апIурайи кагъзар гъадагъну.

 

Думу кагъзарикан сабдиъ ихь ватанагьли, Табасаран райондин ЧвулатI гъул’ан вуйи Рамис Качаевдиканра дибикIна. Частнан командирарин гафариинди, Рамис чан подразделениейин хусуси составдин вари эскрариз нумуна гъахьну.

Республикайин главайи Рамис-дин адашна дада Къалабегаз ва Сурижатдиз, чпин бализ лайикьлу, ватанпервер тербия тувувализ лигну чухсагъул мялум гъапIну ва иллагьки, эдебнанна ватанпересвалин тербияйи ва багахьлуйирин ужуб янашмиш’вали Ватан уьбхбан рякъюъ бин ккиврайиваликан гъапну.

Гъи хусуси метлеб айи операция-йиъ швнуд-сад агъзур ихь ватандашари лайикьлуди гъуллугъ гъабхура. Вари гьадму баяриси, Рамисдира чан улихь дивнайи метлебар заан вафалувалиинди кIулиз адагъура. Фунуб вушра дявдин шараитариъ ва дюшюшдиъ дугъу чан жягьтлувал улупура ва варидарихъан жавабдарвал гьисс апIура.

Уьлкейин хатIасузвал уьбхбан рякъюъ ихь эскрари киврайи пай кьимат адруб ву. Дурарин игитвал, дирбаш’вал ва зегьмет аргъаж шулайи наслиз лайикьлу дарс ва нумуна хьибди.