Зубайдат Шябанова
РД-йин УФСБ-йин пресс-гъуллугънаан мялумат тувганси, Табасаран райондин судди Дербент шагьрин саб кючейиъ тIубкIру яракь ккивна кIури, кучIлин хабар туври, телефондиан зенг гъапIу кьюр живан балин абйир-бабар административ жавабдарвалихъна гъахну.
Къайд апIуз ккундучуз, гъябгъюрайи йисан июндин 28-пи йигъан хябяхъдин вахтнаъ сяаьт хьуб хьайиз хьуб дакьикьа ккамиди тяди кюмек тувру гъуллугъарин «102» номерин телефондиз мялум дару касари Дербентдин асас кючйирикан сабдиъ тIубкIру сяняаьт ккивнайиваликан хабар тувру. Ихтиярар уьрхру органарин гъуллугъчйири гъурху серенжемари думу мялумат дюзиб даруб субут гъапIну.
Урусатдин РД-йиъ айи УФСБ-йин ва региондин МВД-йин вакиларин сатIиди вуйи оперативвалинна агбан серенжемарин натижайиъ, кучIлин мялуматар туври, зенг гъапIдар Табасаран райондин 12 ва 14 йис яшариъ айи живанар вуйиб ашкар гъабхьну. Дурари чпин тахсир гардандиъ гъибисну. Кьюрид баярин абйир-бабариина журумдин жаза иливну. Живанарихъди ва дурарин абйир-бабарихъди профилактикайин сюгьбатар гъухну.
РД-йин Антитеррористический комиссияйин дахилнаъ айи экспертарин советдин вакил Вефадер Меликовди гъапиганси, кучIлин мялумат, мисалназ террорин гьяракатарикан кIури зенг апIувал – му уголовный тахсиркарвал ву. Думу тахсиркарвализ РФ-дин УК-йин 207-пи маддайиинди 200 агъзурилан 1 миллиондиина журум вая 3 йислан 5 йис’ина дустагъ апIувалин жаза улупна. Мурарилан гъайри, террориз аькси гьяракатар гъахру серенжемар тешкил апIру вахтна тялукь органари ахьу харжарра кьяляхъ тувну ккунду.
«Жавабдарвалихъна 14 йис ва артухъ гъабхьи живанар хуру. ДумутIан бицIи яшариъ айи тахсиркарвал гъапIу бицIидар полицияйин гьисабназ гъадагъуру, хъа абйир-бабар, гьаму дюшюшнаъси, журумди илибтIу пул тувуз мажбур апIуру. Къайд апIуз ккундузуз, бицIидари ва живанари чпи кучIлин зенгар гъапIну кIури, жавабдарвалихъна дархрувалин ва чпиз дидкан фукIара даршлувалин фикир апIура. Гьаддиз абйир-бабари чпин веледар гьаму жюрейин «зарафатарихъан» жаваб тувну ккунивалин гъавриъ тIаъну ккунду.
Гьюрматлу абйир-бабар! Гьаму жюрейин дюшюшар дархьбан бадали, ичв веледарихъди сюгьбатар гъайихай, хизандизси, думу дюшюшари гъулазра, райондизра туврайи чIуру тясирнакан дурариз ккидибтай.
