Гюльнара Мягьямедова
2016-пи йисан Терек нир чан гъирагъарилан удубчIвиган, дидин Гудийский кIуру циркил кьалу гъумрахьди абцIну. Гьадму себеб вуди, балугъари кюр гатIабхьру Аракумский ва асккан Терский даграриз гъюру штун кьадар цIиб гъабхьнийи.
Аракумский ва Асккан Терский даграрин агьвалат къайдайиз хпан бадали, 2021-пи йисан июндин вазли Росрыболовствойин ва Дагъустан Республикайин гьюкмин органарин вакилари дагар лазим кьадар штухъди тямин апIбан гьякьнаан совещание кIули гъубхнийи. Совещаниейин натижйириз дилигну, Терек нирин Гудийский циркил кьалу гъумрахьан марцц апIуз къарар адабгънийи.
2022-пи йисан 21-пи феврали Дагъустан Республикайин Глава Сергей Меликов Аракумский ва Асккан Терский даграр цIийи алаъбан ва дурар уьрхбан ляхнариз кюмек тувуб ккун апIури, РФ-дин Президент Владимир Путиндихьна илтIикIнийи.
Июндин 5-пи йигъан «Дагъустан» РИА-йин конференцйир гъахру залиъ «Главрыбвод» ФГБУ-йин Терско-Каспийский филиалин начальник Арип Аьбдуллаев, «Главрыбвод» ФГБУ-йин проектар уьмриз кечирмиш апIбан, къайда ва кьиматар иливбан идарайин кIулиъ айи Артем Шемяков, «Главрыбвод» ФГБУ-йин Терско-Каспийский филиалин аьхюрин заместитель Уьмар Микаилов, балугъарин Федеральный агентствойин Кафари Кавказдин ерли управлениейин табиаьтдиъ балугъар артмиш апIру йишвар уьрхру отделин кIулиъ айи Мягьямед Гитиномягьямедов Терек нирин Гудийский циркил марцц апIбан серенжемарикан яркьу мялуматар туври, республикайин СМИ-йин журналистарихъди гюрюшмиш гъахьну.
Мягьямед Гитиномягьямедовди къайд гъапIганси, Аракумский ва Асккан Терский даграр Дагъустан Республикайиъ балугъари кюр гатIабхьру варитIан чIатху йишвар ву. Думу даграр ихь республикайин аьтрафариин кафари Каспийин экологияйин гъурулушдин жинснан жюрбежюрвал уьбхру ва артмиш апIру дакьатарикан саб ву.
Даграриз шид Терек нирин Гудийский цирклиан гъюра, хъа гьадлинтина шид Зенковский, Ждановский ва Сиражудиновский гъанавариз гъябгъюра. Гъанавар «Главрыбвод» ФГБУ-йин Терско-Каспийский филиалин эйсивалиъ а. «Аьхиримжи хьуд йисандин арайиъ Терско-Каспийский филиали думу гъанавар марцц апIури, 1 миллион кубический метр кьалу гъум ккадабцIну. Амма думу ляхнарин натижайиъ Асккан Терский ва Аракумский даграр штухъди арцIундар. Гудийский циркил кьалу гъумрахьди абцIнайивалиан Терек нир’ан даграриз шид гъюрадайи», – гъапнийи Мягьямед Гитиномягьямедовди.
Уьмар Микаиловдин гафариинди, 2023-пи йисан Терек нирин Гудийский циркил марцц апIуз пулин дакьатар адрувализ дилигну, думу ляхнар гъухундайи. «2024-пи йисан Федеральный бюджетдин гьякьнаан федеральный къанун кьабул апIруган, Росрыболовствойин идарайи Терек нирин Гудийский циркилмарцц апIбан бадали, пул деебтбан гьякьнаан хъана аьрзйир тувнийи. Ва Урусатдин финансарин министерствойи аьрзйир кьабул гъапIнийи.
2024-пи йисан февралин вазли «Главрыбвод» ФГБУ-йин Терско-Каспийский филиали Терек нирин кIанаъ йишв ебцбан ляхнар заказ гъапIнийи. Гудийский циркил марцц апIбан ляхнар тешкил апIури, 12 экскаватор, 25 самосвал ва 3 бульдозер арендайиз гъадагънийи. Натижайиъ, арайиъ айи ляхнариз дилигну, Шавинский разлив ккебгъу йишвхъанмина 11 километр манзилнаъ саб секундайиъ 75 кубический метр шид деебтру, 20-дилан 40 метрйиина яркьу ва 1,5-2 метр деринвал айи гъанав тикмиш гъапIнийи», – ктибтура Уьмар Микаиловди.
Аракумский ва Асккан Терский даграриъ гъубшу аьсрин 70-пи йисари 500-550 миллион жинснан бицIи балугъар артмиш апIури гъахьну. Думу 36200 гектариин али даграрикк саб гектарилан 15 миллиондиинакьан бицIи балугъар гъадагъуз улупнайи кьадар вуйи.
Даграриъ гъюрайи шид кам дубхьну, йисандин арайиъ 400 миллион бицIи балугъар артмиш апIувал кам гъабхьну, гьаддихъди сабси гьар йисан масу туврайи балугъарин кьадарра 8-10 агъзур тоннайн цIиб гъабхьну.
«Главрыбвод» ФГБУ-йин Терско-Каспийский филиал Терек нирин Гудийский циркил марцц апIбан аьхиримжи ляхнарихъна дуфна. Гьаму вазлин аьхириз вари ляхнар дапIну ккудукбанди ву.
