Нариза ТIаибова
Урусатдин машгьур аьлим Дмитрий Лихачевди культурайин артмиш’валикан, му цирклиъ алахьурайи читинваларикан, арайиз гъюрайи дигиш’валарикан улхури, чан бикIбариъ, «Библиотекйир лихури имбукьан гагьди, культура дубгидар» дупну, къайд гъапIну. Дугъриданна, му гафариъ дерин мяна а. Хъа гъизгъин еришариинди технологйир артмиш шулайи гъийин аьсриъ саб жерге дюшюшари зиихъ улупнайи гафарин гьякьлувал субутра апIура.
Жюрбежюр китабарна маракьлу журналар, хайирлу мялуматар кайи газатар уьрхюри, библиотекйири, жямяаьтлугъ уьмриъ аьхю роль уйнамиш апIура. Жиниб дар, зиихъ узу кIваина гъахи деврин технологйирин гъизгъинвалин натижайиъ, гьяйифки, жигьиларин арайиъ библиотекйирихьна вуйи маракьлувал йигълан-йигъаз зяиф шула, вушра мициб гьякьикьатдиъ ижмишнаан къайд апIуз ккундузуз: китабдин кьувват ва кьудрат я компьютерихьан, я телефондихьан эвез апIуз удукьруб дар.
1990-пи йисари уьлкейиъ арайиз гъафи аьгьвалат себеб дубхьну культурайин, гьадму гьисабнаан библиотекйирин циркил дикъатнаан идипну, гъагъи гьялназ гъафнийи. Му циркилра къайдайиз хпан метлебниинди аьхиримжи йисари уьлкейиъра, республикайиъра хайлин серенжемар гъахура. Культурайин артмиш’валин гъаразнаъди кьабул гъапIу уьлчмйирин натижайиъ Хив райондиъра хайлин ужуб терефнахъинди дигиш’валар духьна. Гьаци, саб жерге гъулариъ клубарин хуларихъди сабси библиотекйирин аьгьвалатра ужи алапIна.
Гъи Хив райондиъ ЦБС, дидин дахилнаъди бицIидарин библиотека ва 22 гъулан библиотекйирин филиалар ляхник ка.
– Библиотекйирин вакилари йишвариин чпин асас кьувватар агьалйирин вари гъатарин арайиъ китабарихьна вуйи маракьлувал жанлу ва яркьу апIбаз, китабарин кьувватлувалин, дурар урхбан мянфяаьтлувалин гъаврикк ккаъбаз сарф апIура. Ляхин лазим саягъниинди ккабалгбаз гъи ЦБС-диъ лазим вуйи вари шартIар яратмиш дапIна. ЦБС-дин филиаларин аьгьвалатнакан гъапиш, Мажвгул, Асккан Яракк, ГъуштIил, ЦIудихъ, ЦIийи Фрюгъ, Кашкент гъуларин ужагъар цIийидар ву. Имбу гъулариъра дурар айи мумкинвалариз асас вуди рас дапIна.
Гьамусяаьтна райондин библиотекйирин уьмуми гъурулушдин гьисабнаъ 130000 китаб а. Дурар асас вуди урус ва дагъустан халкьарин чIалариинди вуйи, жюрбежюр чIалариан ихь чIалариз таржума дапIнайи китабар ву. Китабарин фонд деврин тIалабариз асас вуди таза алапIбаз, мумкинвалариз лигну, фикир туврача, вушра му жигьатнаан гьял дапIну адру месэлйир гъузра.
Йишвариин библиотекйириъ гъабхурайи ляхникан гъапиш, учу саки гьарсаб серенжем мектебариъ урхурайидарихъди сигъ аьлакьа-йиъди гъабхурача. Жюрбежюр шаирарин ва писателарин яратмишариз бахш дапIнайи литературайин вечерар, жюрбежюр выставкйир гъахуб ич вакилари аьдатнаъ ипна. Лазим серенжемар гъахурача, хъа гележегдиъ ляхин имбубсан жанлуди гъабхбиин зегьмет зигидича, – гъапну Хив ЦБС-дин директорин вазифйир тамам апIурайи Наташа Гьяжимурадовайи.
