Мейлан Нежефов
Урусатдин игит, генерал-лейтенант Эседулла Абачевдин жягьтлувалиинди багъри гъулаъ «Илжин раццахъ» кIуру йишвахь Ватандин Аьхю дявдиъ ва гьаддихъанмина гъахьи дявйириъ, Ватандин азадвал бадали гъахьи, хъа гьамус миллетчйирихъди вуйи женгариъ жил’ина дюзвал, ислягьвал хпак ва гъалибвал багахь апIбак чпин хусуси пай киври, кьягьялвалиинди уьмриан гъушу эскрариз бахш дапIнайи багъ гьаму йисан сентябрин аьхирари абццди.
Му багъдиъ жюрэтлу ватандашарин суратар кирхди, дявдин техникайин ва музейин алатар дивди ва гьацира гьюрматнан гьарар итди. Гъабхурайи ляхниз кьимат, фикир ва дакьатарин кюмек тувуз ният ади, 12-пи авгъустди меркездиан ва гъунши гъулариан, районариан ва шагьрарин ихь ватанагьлийир ва багъри гъуландар уч гъахьнийи. Гьюрматлу хяларин арайиъ Дагъустан Республикайин Халкьдин Собраниейин РД-йин Главайин вари ихтиярар айи вакил Нюсрет Уьмаров, Дагъ. Огни шагьрин кIулиъ айи ва хусуси метлеб айи дявдин операцияйин иштиракчи Замир Гьяжимурадов, Табасаран ва Хив районарин кIулар Мягьямед Къурбанов ва Ярмет Ярметов, Хив ва Табасаран районарин РЭС-дин начальник Багьаутдин ТIагьиров, муниципалитетдин жиларин отделин начальник Байрамбек Кучув, культурайин, спортдин, жигьиларин политикайин ва туризмдин начальник Казбек Къазиев айи.
Гьюрматлу хялар гъулан бицIидарин площадкайилан, культурайин хуллан, библиотекайилан, администрацияйин, мектебдин, ФАП-дин дараматарилан илдицнийи. Натижйир йивури, гъулан йирси мектеб али йишв’ин мини футболин площадка ва модульный мектеб дивуз къарар адабгънийи. Мушваъ гьацира учIруди дийигънайи ва духну ккуни расвалин ляхнарикан гъулхнийи, дурар гьял апIуз чарйир гъагнийи. Гьацира, гъулан зиихъ буругъ йибтIну шид адабгъуз, дидихъди сабси хьуб тонна гъюру цистерна дивну гъул’ина сабсана шид хуз, мидланра савайи гьамус абццрайи КIваин уьбхбан багъдин багахь акварин трансформатор дивуз, дидихъди шалмнар итуз планламиш гъапIнийи.
Багъ абццруган, Зилдиккна ДР-йин кIулиъ айи Сергей Меликов хялижв хьиди.
Аьхириъ хялари Ярккарин гурилан Зильдикк, Мажвгул гъуларизди гъюрайи рякъ апIурайи ООО «ДБС Групп» фирмайин кIулиъ айи Хадис Дибирдадаевдихъди рякъюн аьгьвалат фициб вуш, планариинди рякъ аьхирихъна филан гъюруш, гаф-чIал гъапIнийи.
