Зубайдат Шябанова
Январин 15-16-пи йигъари Москва шагьриъ ВДНХ-йиъ вари Урусатдин «БицIи Ватан – Урусатдин кьувват» форум кIули гъубшну.
Серенжемдиъ уьлкейин 89 региондиан муниципалин образованйирин 7,5 агъзур вакилар иштирак гъахьну. Дагъустандин делегацияйин дахилнаъ айи 235 кас – муниципалин районарин, шагьрарин ва гъуларин поселенйирин главйир вуйи.
Форумдин тешкилатчйири серенжемарин программа лап яркьуди ва маракьлуди гьязур дапIнайи. Сабпи йигъан дискуссйирин шубуб аьхю майдан, «гергми стол», 32 гюрюш, 25 лекция, юкьуб аьхю проектарин презентация ва жара серенжемар кIули гъухну. Форумдин деловой программа шубуб асас паярикан ибарат вуйи: «Кьувват инсанариъ а», «Кьувват аьдатариъ а» ва «Кьувват артмиш’валиъ».
Дагъустандин дестейин дахилнаъ чпин делегацйирихъди Табасаран ва Хив районарин главйирра айи. Серенжемарин кьюбпи йигъан учу дурариз, уьлкейин Президентдин жягьтлувалиинди ва иштирак’валиинди гъабхурайи форумдиан дурари фициб дарс гъадабгъураш, фуну секцйириъ ва гюрюшарин майднариъ иштирак шулаш гьерхри, зенг гъапIунча.
Табасаран райондин делегацияйин кIулиъ айи Мягьямед Къурбановди къайд гъапIганси, лекцйириъ дугъу хайлин мянфяаьтлу мялуматар гъадагъну, хъа бязи методар чан ляхниъ ишлетмиш апIуз мумкинвалар агиди.
«Табасаран райондин делегация варитIан аьхюдарикан саб ву. Форумдиъ Куркакк, Къужник, Гуми, Дарвагъ, Жулжагъ, Цухтигъ, СиртIич ва Хюрикк гъуларин поселенйирин главйирра иштирак шула.
Накь асас вуди вари образованиейин майднариъ иштирак гъахьунча, политикайин ва жямяаьтлугъ деятеларихъди гюрюшар гъухунча. Гъи ихь делегация уьлкейин Президент Владимир Путиндин иштираквал ади гъябгъру ва уьлкейин шагьраринна муниципалитетарин арайиъ гъуху конкурсарин натижйир йивбан серенжемдиъ иштирак шула.
Дюзди кIуруш, гьамцдар аьхю форумариъ иштирак хьувал муниципалитетарин вакилариз аьхю хъуркьувал ву. Гьаму жюрейин серенжемар кми-кмиди гъахурайиш, харжи даршлийи.Яшайиш ва дуланажагъ гьялаки нирси дигиш шула. Гьаму жюрейин майднариин гъадабгъурайи тажрубайин кюмекниинди уьлкейин муниципалитетариъ маракьлу практикйир уьмрин рякъюз адагъуз мумкинвал хьибди. Жара регионарин муниципалитетарин главйирихъди вуйи гюрюшариъра иштирак гъахьунча. Дурарин улихь ихь республикайиз, хъа асас вуди Табасарандиз гъюбан теклиф дивунза. Ихь ватан варитIан успагьидарикан гьисаб шула. Ухьхьан ватандиинди ва ватандашариинди дамагъ апIуз шулхьухьан. Гьацира узуз «Урусат гизаф миллетарин ва аьдатарин уьлке» темайин серенжемра кьабул гъабхьунзуз. Урусатдиъ анжагъ саб ихь республика гъадабгъиш, бицIи Ватандиъ мясляаьт ва ислягьвал уьбхюри, жа-жара динар хъайрайи хайлин халкьар чвйирси албагну яшамиш шула. Иллагьки гьаддиъ, яна инсанарин сабвалиъ ихь уьлкейин кьувват айивалиъ умудлу вуза», – гъапну Мягьямед Къурбановди.
Хив райондин глава Ярмет Ярметовдира аьхю аьшкьниинди форумдикан ктибтурайи. Дугъан гафариинди, Дагъустандин стенд ВДНХ-йиъ варитIан машгьур ва маракьлу майднарикан саб ву.
«Гъи форумдиз сар-сарин тажрубайихъди таниш хьуз, чпин муниципалитетарикан, улихь дийигънайи месэлйирикан ктибтуз, ляхниъ ишлетмиш апIру мянфяаьтлу ва хайирлу мумкинваларикан мялуматар гъадагъуз вари уьлкейиан вакилар дуфна. Форумдин иштиракчийи вуди узуз муниципалин самоуправленйирин Ассоциацияйи гъабхурайи серенжемар кьабул гъахьунзуз. Душваъ учу, главйир, сар-сарин ляхнихъди, тажрубайихъди ва планарихъди таниш гъахьунча. Форумдиз «БицIи Ватан – Урусатдин кьувват» ччвур аьгъдарди тувнайиб дар. Гьюкум, уьмур, дуланажагъ ва агьалйирихъди вуйи сигъ аьлакьйир иллагьки муниципалитетарилан ккергъра. Му цирклин артмиш’вализ форумди аьхю кьувват тувур кIури, миж кайиз», – гъапнийи ич сюгьбатнаъ Хив райондин делегацияйин кIулиъ айи Ярмет Ярметовди.
Къайд апIуз ккундузуз, Хив райондин делегацияйин дахилнаъ Хив, Гъвандикк, Ургъа гъулан поселенйирин главйирра айи.
