Зубайдат Шябанова
Июндин сабпи йигъан Табасаран райондин Хючна гъулан культурайин хулаъ БицIидар уьрхру йигъаз бахш дапIнайи серенжем кIули гъубшну.

Серенжемдиз хусуси метлеб айи дявдин операцияйиъ кечмиш гъахьи ва гьадушваъ Ватандин маракьар уьрхюрайи эскрарин бицIидариз теклиф гъапIнийи.
«Райондиъ ихь бицIидари ужудар аьгъювалар ва рягьятвал гъадабгъуз, дурар мюгькамди артмиш хьуз вари шараитар яратмиш апIура. Аьхюдарин вари кьувватар ихь насил ухьутIанна бахтлуди яшамиш хьуз жалб дапIна. БицIидар ихь варитIан багьалу девлет ва савкьат ву. Учу гъитIланминара ихь бицIидари хатIасузвал, вари терефариан вуйи кюмек ва гележегдиин иннанмиш’вал гьисс апIбан бадали, вари мумкинвалар агурча», – гъапну Табасаран райондин главайин заместитель Заур Мусаевди бицIидар машкврахъди тебрик апIури.
БицIи тамашачйириз райондин БицIидарин яратмишарин хулан ва Табасаран драмтеатрин актерари концертдин программа улупну.
Серенжемдин аьхириъ бицIидариз райондин администрацияйин ва Табасаран райондиъ айи КЦСОН-дин терефнаан пешкешар тувну.