Умгьанат Сулейманова
Ккудубшу 2024-пи йис Табасаран райондиз гизаф метлеблу йис гъабхьну – 95 йисандин юбилей къайд гъапIну, саб жерге хъуркьувалар гъазанмиш гъапIну, хайлин чIатху серенжемар кIули гъухну. Гьелбетки, варитIан важиблу гьядиса райондин юбилей гъабхьну. Дагъустандин Глава Сергей Меликовди, райондин агьалйир муниципалитет арайиз гъафихъанмина 95 йис хьувалихъди тебрик апIури, жюрбежюр цирклариан заан хъуркьувалар улупу пишекрар республикайин заан дережайин ччвурариинди ва пешкешариинди лишанлу гъапIнийи.
Заан наградйириз лайикьлу гъахьидарикан сар Табасаран райондин М.Х. Мягьямедовдин ччвурнахъ хъайи райбольницайин бицIидарин отделениейиъ лихурайи аьхюну медсестра, 43 йисандин тажруба айи Айнисе Аьлиева ву. Дугъаз Сергей Меликовди «Дагъустан Республикайин сагъламвал уьбхбан лайикьлу гъуллугъчи» ччвур тувну.
Айнисе Ризаевна Аьлиева 1963-пи йисан Табасаран райондиъ ЦIурутIил гъулаъ аьхю хизандиъ бабкан гъахъну. ЙицIур бицIир – ургур чи ва шубур чве – айи кюлфетдиъ Айнисе чйирик йирхьурпир ву.
Мектеб ккудубкIу Айнисе Ростовдиъ медучилищейик урхуз кучIвру ва, пише гъадабгъну, Табасаран райондин больницайин бицIидарин отделениейиъ медсестради лихуз хъюгъру. Саб бицIи вахтналан думу Акъа гъулаз швушвди гъягъюру.
ЯгъчIвурна шубуд йисандин арайиъ гьар йигъан Акъа гъул’ан Хючназ, мархь-ригъ, хьад-кьюрд дарпиди ляхниз гъюри, Айнисе Аьлиевайи кьан апIувалиан аьзарлуйир чаз ккилигури гъиту дюшюшар тIубариинди ктухуз шулу. Марцци ва намуслу зегьмет зигури хьпаз лигну, Айнисе Аьлиевайиз швнуб-саб ражари Табасаран райондин ЦРБ-йин кIулиъ айидарин терефнаан гьюрматнан грамотйир тувна.
– Му пише ктабгъу кас гьаммишан агьалйирин сагъламвалин гъуллугънаъ хьуз гьязур вуди ккунду, иллагьки бицIидарин отделениейиъ лихурайидар, – кIура Айнисе Аьлиевайи. –ГвачIнинган ухди гъудужвуриз ва ухди швушв гъахириз Аллагьу Тяаьлара кюмек шулу. Узу йиз хулан ляхнарра апIуз, вахтниинди гьюкуматдин ляхнизра гъягъюз хъуркьразу. Фуну ляхниъ вушра, дидин къайда дюбхну ккунду, иллагьки агьалйирин сагъламвал уьбхбаъ. Аьзарлу духьнайи бицIир сагъ апIуз вуйи серенжемар кIули гъахуз думукьан рягьятди дар, фицики гафар апIузкьан дудубгъну адру бицIирихьан чан фу иццураш духтрикна пуз шулдар. Узу бицIидарин отделениейиъ лихуз хъюгъну имбу йисаритIан гьамус арайиз удучIвнайи уьзрарин жюрйир гизаф артухъ духьна. Мисалназ, гьамусяаьтна учухьна астма, келлейин давление, сахарный диабет, бронхит, пневмония ва гизаф жара уьзрар кайи бицIидар хура. Хъа бицIидарин варитIан яркьуди ттарагънайи уьзрарикан сабпи йишв’ин алиб келлейин давление ву. Отделениейиъ бицIидар сагъ апIуз лазим вуйи дармнар ачуз. Гьяйифки, жюрбежюр уьзрар сагъ апIури ич отделениейиъ дахъру бицIидарин кьадар йислан-йисаз артухъ шула.
– Му ляхниъра бицIидар, хулаъра жвуван шубур велед… инжик шуладарна?
– Ваъ, инжик шуладарза, гьаз гъапиш узу чIатху хизандиъ аьхю гъахьир вуза. Узу живанди имидитIан бицIидариин юкIв алир вуза. Гъира, фукьан бицIидар аш, гьадмукьан ккундузуз. БицIир айи йишваъ — шадвал, хъа аьхюр айи йишваъ берекет шул, кIуру ихь абйири.
Гьарган бицIидарин сагъламвалин гъаравлиъ хьуз тажрубалу ва намуслу зегьмет зигурайи духтир Айнисе Аьлиевайиз жандин сагъвал, кIван шадвал ляхниъ хъуркьувалар ишри.
