Магьа гъи-закур цIийи 2025-пи йис улубкьура. ЦIийи йис ва кьюрдун тятIилар ихь бицIидари аьхю аьшкьниинди гюзлемиш апIуру, хъа аьхюдар му вахтна, чпин уьмрин саб пайнан натижйир йивури, гъюзимбубдихьна умудниинди лигуру. Гъит цIийи 2025-пи йисан ихь варидарин марцци ниятар, кIван хиялар кIулиз удучIври! Ихь уьмриъ зарб гьяракатниинди гъягъюрайи дигиш’валар ужувлахъинди, дюн’яйиъ ислягьвал зияда хьпахъинди ва саламатвалихъинди илтIикIри! Ватан бадали гъягъюрайи женгариъ гъалибвал гъадабгъну, улубкьурайи йисан ихь жюрэтлу эскрар вари сагъ-саламатди жвуван хизанарихьна хъадакну гъюб ккун апIурача.
Ктабхъурайи йисан учу, газатдин коллективди, ихь жямяаьтлугъдин ва кIул’инди ватанагьлийирин уьмрин важиблу месэлйир гъитIиккури, хайирлу теклифар диври ва ихь халкьдин вакиларихъди гюрюшмиш шули, хайлин месэлйир гьял апIбак жвуванра пай кивунча. Улубкьурайи йисанра ич коллективдин ва газат урхру юлдшарин арайиъ ихтибарлу аьлакьйир хъана мюгькам шул пну, умуд киврача.
Гирами дустар! Улубкьурайи 2025-пи йис тебрик апIури, учвуз гьарсариз жвуван кIван умударихъ хъуркьуб, хизан-кюлфетдиъ девлетна берекет артухъ хьуб ва багъри Дагъустандин мублагъ ругариин уьмурлугъ ислягьвалиинди миллетар чвйирси албагну яшамиш хьуб ккун апIурача!

Аьхю гьюрматниинди,
«Табасарандин нурар» газатдин коллектив