Гюльнара Мягьямедова
2018-пи йисхъанмина гьар йисан ЦIийи йис улубкьайиз улихьна Жигьиларин ляхнариз лигру федеральный агентствойин кюмекниинди «КIван метлебар тамам апIру елка» кIуру вариурусатдин акция гъабхуб аьдатнаъ абхъна. Думу акция «Узухъди умуд кив» проектдин дахилнаъди гъябгъюрайиб ву. Проектдин ва акцияйин тешкилатчйир Урусатдин жигьиларин ва бицIидарин «Сарпидарин гьяракат» кIуру тешкилат ву.
Акцияйин метлеб уьмрин читин аьгьвалатнаъ ахьнайи бицIидариз пешкешар тувуб ву. 3 йислан 17 йис’ина яшар айи йитим, абйир-бабарин кюмек дарди гъузу, сакьат, сагъ апIуз даршлу уьзур кайи бицIидарихьан, хусуси метлеб айи дявдин операцияйиъ иштирак шулайидарин веледарихьан, ДНР-иъ, ЛНР-иъ, Запорожьейин ва Херсондин, Белгороддин, Брянскдин ва Курскдин областариъ яшамиш шулайи бицIидарихьан чпин кIваъ айи метлебнакан дибикIну, хътапIуз шулу. Тамам апIру бицIидарин метлебар шубуб йишваз пай дапIна: бицIирин юкIв хъайи пешкеш, метлеб тамам апIрури чав ктабгъу пешкеш ва бицIирин фунуб вушра тIалаб тамам апIуб. Мисалназ, саб шагьриз, ясана жара йишваз гъягъюб, машгьур касдихъди гюрюшмиш хьуб ва гь. ж.
БицIирин кIваъ айи метлеб тамам апIуз ккунири акция гъабхру йи-шварихь дивнайи елкайик кибтIнайи кагъаз ктабгъуру ва гьаддик кайи бицIирин кIван мурад тамам апIуру. Акция юрутмиш апIуз хъюгъхъанмина гъийин йигъаз шубуб миллиарддиина кьимат айи 215 агъзуртIан зиина бицIидарин кIван мурадар тамам гъапIну. Думу акцияйиъ гьюкмин идарйирин, коммерцияйин тешкилатарин вакилар, бизнесменар, депутатар иштирак шулу. Гьар йисанси гьаму йисанра РФ-дин Президент Владимир Путинра думу акцияйиъ иштирак гъахьну.
2024-пи йисан декабрин аьхириъ чан заместителарра хъади, Дагъустандин Огни шагьрин мэр Замир Гьяжимурадов ва РД-йин Халкьдин Собраниейин депутат Сефер Аьлиев, шагьрин кьялан майдандиин дивнайи елкайихьна душну, «КIван метлебар тамам апIру елка» акцияйиъ иштирак гъахьну.
Хусуси метлеб айи дявдин операцияйин иштиракчйирин бицIидари, сакьат бицIидари ЦIийи йисаз чпиз ккуни пешкешнакан дибикIну, елкайик кагъзар китIнайи. Шагьрин кIулиъ айидари елкайикан думу кагъзар ктагънийи ва душвак кайи тIалабар тамам апIуз гаф тувнийи. БицIидарин кIван метлебар, кьюрдну ликариин алахьрударилан гъадагъну, Москвайиз зоопаркдиз гъягъюз ккунивалиинакьан, жюрбежюрдар вуйи. Думу пешкешар бицIидарихьна гъурукьну.
«КIван метлебар тамам апIру елка» акцияйиъ Табасаран райондин глава Мягьямед Къурбановра, райондин депутатарин собраниейин председатель Иса Исаевра иштирак гъахьну. Муниципалитетдин администрацияйин улихь дивнайи елкайикан дурари Рушвлан вуйи Къазиаьли ва Фатима Гьяжимягьямедоварин, ТIаттлан вуйи Салман Гьяжиибрагьимовдин кагъзар ктагъну. Думу кагъзариъ бицIидари чпин юкIв хъайи уюнжагъар, спортдин палтар, шиклар зигру кьалмар ккун дапIнайи. Райондин кIулиъ айири бицIидарин тIалабар тамам апIуз гаф тувнийи ва, пешкешар тувбан бадали, дурариз райондин администрацияйиз теклиф гъапIнийи.
Администрацияйиъ кIули гъубшу серенжемдиъ РД-йин Халкьдин Собраниейин депутат Алавудин Мирзабалаевра иштирак гъахьнийи. Дугъу, бицIидар улубкьурайи цIийи йисахъди тебрик дапIну, дурариз пешкешар тувнийи. «Гьамцдар акцйири ухьук рягьимлувалин ляхнар гъахуз гьевес капIру. Хъа бицIидариз гьамцдар пешкешари машквар гьаммишандиз кIваин гъибтру. БицIидарин машнаъ шадвал рябкъюб варитIан заан ву, фицики, дурарикан гьарсар хъайивализ ва фикир тувбаз лайикь му ву», – гъапнийи Мягьямед Къурбановди.
Хив райондин глава Ярмет Ярметов райондин идарйирин кIулиъ айидарихъди сатIиди «КIван мурадар тамам апIру елка» акцияйиъ иштирак гъахьну. «БицIирин кIван мурад тамам апIубтIан, думу шад капIбан кIваз хуш вуйи ляхин адар. Ихь бицIидариз ЦIийи йисан сагъвал, мектебдиъ хъуркьувалар, шаду ва бахтлу уьмур ккун апIураза», – гъапнийи Ярмет Ярметовди, 14 йисаъ айи Зулейхайиз ва 10 йисаъ айи Аьлдиз пешкешар туври.
2024-пи йисан 5-пи декабри ккебгъу акция 2025-пи йисан 28-пи феврализкьан давам хьибди.
Гьамциб ужуб аьдат хъана гизаф йисари давам хьибди кIури, умуд кивурхьа.
