Наргиз Гюлечова
Улихьна йигъари Дагъустандин «Альтаир» образованиейин центриъ «БицIидариз юкIв тувраза» конкурсдин региондин этапдин натижйир гъивну. Му конкурс, аьлава агъювалар тувру мялимарин пишекарвалин устадвал ахтармиш апIуб себеб вуди, гьар йисан вари Урусатдиъ кIули гъябгъюрайиб ву.
Мартдин вазли конкурсдин заочный пайнаъ иштирак хьуз кIури, республикайин шагьрар-районариан хайлин мялимари аьрзйир тувнийи. Гьадрарикан ужударсдар 30 мялим гъядягъну, конкурсдин очный пай Каспийск шагьрин 2-пи нумрайин мектебдиъ майдин вазли кIули гъубшну.
Душваъ Табасаран райондин БицIидарин яратмиш апIбарин хулаъ ляхин апIурайи Максим Мягьрамов, Гюзель Мурадялиева ва Сейраханум Ражабова иштирак гъахьнийи. «Табасарандин нурар» газатдиз Сейраханум Ражабовайи туву мялуматариинди, райондиан вуйи шубрид мялимарра жа-жара номинацйириъ иштирак гъахьидар ву.
– «БицIидариз юкIв тувраза» конкурс гьар йисан кIули гъябгъюра. Душваъ мялимар саб-швнуб номинацияйиъ талитариз удуIвура. Узу иштирак шулайи художественный номинацияйиъ республикайин жара муниципалитетарианра кади, цци 12 кас иштирак гъахьнийи.
Конкурсдиъ иштирак хьуз хътапIурайи аьрзайихъди сабси заочный пайназ чав тамам апIурайи ляхникан ктибтурайи документар ва бицIидарихъди фу жюрейиинди ляхин апIураш улупурайи видеоролик хъадапIну ккундийи. Эгер иштиракчийи аьрзайихъди хъадапIнайи документарна видео конкурсдин комисссияйиз кьабул гъабхьиш, кьюбпи – очный – пайназ удучвIуз ихтияр тувра. Думуган, гьарсар иштиракчийиз чан номинацияйиан 3 табшуругъ тувра: тестирование, ачухъ дарс гъабхуб ва командайихъди ляхин апIуб.
Гьамрар вари тамам гъапIган, иштиракчйириз баллариинди кьимат дивра», – ктибтнийи Сейраханумди.
Табасаран райондиан конкурсдиъ иштирак шулайи мялимари ужуб презентация гьязур дапIнайивализ лигну, дурари шубриддира пешкешнан йишвар гъадагъну. Конкурсдин тешкилатчйири дурар дипломариинди лишанлу гъапIну.
«Учу апIурайи ляхнихъди аьлакьалу конкурс шула кIури гъеебхьси, райондин бицIидарин яратмишарин хулан директор Назиля Мусаевайи ва методист Рябият Гьяжиевайи мялимар душвариъ иштирак хьан бадали, хайлин зегьмет зигури шулу. Улихь гьацдар аьхюдар хьайивалиан коллективдинра ляхнихьна вуйи аьшкь артухъ шулу. Магьан гьаму ражарира му кьюрид касари учуз, конкурсдин шубрид иштиракчйириз, хайлин кюмек гъапIунчуз. Чухсагъул чпиз», – аьлава гъапIну Сейраханум Ражабовайи.
