Нариза ТIаибова
Аьхиримжи йисарин статистикайин улупбариз гъилигиш, Урусатдиъ ляхин апIуз удукьру гъатарин арайиъ бикарвалин месэла гьял апIбан метлебниинди саб жерге сережемар гъахура. Гьадму гьисабнаан бицIидариз гьюкуматдин терефнаан сабвуйи пособие тувбан бадали улупнайи шартIарихъ хъуркьбан гъаразнаъди асас пай жигьил хизанарин вакилари чиб-чпиз ляхнин йишвар яратмиш апIури, гъазанж гъадабгъурайивал субут апIувал кьувватнаъ ипну. Ав, тялукь ляхин гъабхбан натижайиъ гьисабнаъ айи бикарарин кьадар хайлин кам дубхьна. Хъа вушра ухьу гъуларин гьякьикьатдиз лигидихьа.
Хив райондиъ агьалйир ляхнихъди тямин апIбан центрин кIулиъ айи Надир Уьмаровди субут апIурайиси, райондиъ гъудуркьу ляхнин йишвар адрувалин, экономикайин аьгьвалат мюгькам дарувалин себебариан бикарвалин месэлара гьелелиг учIруди гъубзра.
– Гьамусяаьт Хив райондин аьгьвалатнакан кьатI’иди гъапиш, ухьуз айидар йишвариин лихурайи мектебар, сагъламвалин ва саб жерге яшайишдин игьтияжар гьуркIру идарйиртIан дар. Душвариъра мялум вуйи ва аьхиризкьан мялум дару себебариан саки гьар йисан ляхнин йишвар кам апIура. Жараси жигьилариз зегьмет зигру гьаммишандин ляхнин йишвар гъулариъ адар. Айи гъуллугъаризра жигьилар, иллагьки баяр, гьюкуматдин ляхниъ гъадабгъру маважиб цIибди рябкъюри, рази шуладар. Ав, гъазанж адруган, гьелбетда, хизан уьбхюз гъагъиди ву, иллагьки деуз хусуси хулар хътрудариз. Хъа дицдар жигьиларин кьадарра ихь арайиъ бицIиб дар.
Ккудубшу йисан райондиъ ляхин абгури учухьна илтIикIу 302 кас гьисабназ гъадагънача. Дурарикан 104 дишагьлийир, имбу 198 жилар ву. Айи мумкинвалариз лигну, дурарикан гьарсар ляхнихъди тямин апIуз уьлчмйир кьабул апIурача.
Гьаци, улупнайи муддатнаъ федеральный дережайиъди жара гъапIу пулин кюмекниинди шубуб вазлизди 22 кас вахтназди ляхнихъди тямин апIуз гъабхьну. ТятIиларин вахтна 2 набалугъра жюрбежюр ляхнариина жалб дапIна. Кьюр касдиз гьюкуматдин терефнаан чан хусуси ляхин ачмиш апIбазра кюмекар тувна. Гьисабназ гъадагъу бикарариз тялукь пособиеси улупнайи вахтна Хив райондиъ 4 654 000 манат жара дапIна.
Агьалйир ляхнихъди тямин апIбан месэлйирихъди сабси артмиш шулайи наслар саб жерге яшайишдиъ игьтияжвал айи пишекарвал гъадабгъбахьна жалб апIбазра фикир туврача, – аьлава гъапIнийи Надир Уьмаровди.
Дугъриданна, гъи уьлкейин терефнаан саб жерге пособйирна кюмекар тувувал артухъ дапIна, амма миди бикарвал кам дапIна пуб дюз шуладар. Йишвариин гьарури, чав ляхнихъди фици тямин апIураш, гъавриъ хьубра читин дар. КIулди Хив райондикан гъулхиш, аьхиримжи кюд йисандин муддатнаъ хайлин гъулариан агьалйир гъунши СтIал Сулейман, Мягьярамкент районарин аьтрафариин ерлешмиш духьнайи аьмлюхъин, вичун, беълийин, тIумтIин багълариъ сикин дарди лихура. Дурарра асас вуди дишагьлийир.
Гъийин девриъ, нагагь деуз хуларра адарди гъабхьиш, гьюкуматдин ляхниъ лихуру кIури, хизандин дуланажагъ лазим дережайиъди ккабалгуз лап читин ву.
Ав, бицIидар айи хизанариз аьхиримжи йисари гьюкуматдин терефнаан туврайи пособйирин кьадар хайлин артухъ, хизанариз кюмек тувуз вуйи цIийи программйир кьабул дапIна. Хъа бицIидарин игьтияжар гьуркIбан бадали вуйи харжарикан гьаз-вуш улхрур адар: алабхьру-ипIрубдин кьиматарикан пуб лазимра дар. Я думу кюмекра вари бицIидарихьна рубкьурадар. Улупнайи тIалабариз гъилигиган, уву швнубна саб кадабгъну ккунду. Пособйир, пенсйир, вазлин маважибар фукьан артухъ гъапIишра, кьиматарин зиин гюзчивал дурубхкьан гагьди, я агьалйирин дуланажагъ за апIуз, я бикарвалин месэла гьял апIуз хьибдар.
