Наргиз Гюлечова
Дагъустандиъ Рамазандин ваз улубкьси, мусурман касари сар-сариз ифтариз дих апIру аьдат дубхьна. Ифтар ушв гьибтувализ кIура. Аьхиримжи йисари му гирами вазли ифтариз гъягъювал ктарди, гизаф мертебйирин хуларин гьяятариъ уртахъди вуйи ушв гьибтувалин серенжемарра гъахуз хъюгъна. Дицдар сувабнан серенжемар республикайин саки вари шагьрариъ кIули гъягъюра.
Ихь уьлкейин президентдин указдиинди ццийин йис Урусатдин халкьарин сабвалин йис вуди къайд дапIна. Гьаму йисан ушв гьибтувалин серенжемар Халкьарин сабвалин йисахъди аьлакьалу вуди гъахура. Гьамцдар сувабнан мяракйир тешкил апIбиинди 30-рилан зиина миллетар сатIиди яшамиш шулайи Дагъустандиъ халкьарин арайиъ айи сабвал улупура, сар-сарихьна гьюрмат айивал тасдикь шула.
Мисал вуди гъадабгъиш, узу яшамиш шулайи хуларин гьяятдиз шубудар 10 мертебайин хулариан вуйи инсанар уч шула. Гьаму шубрид хулариъ яшамиш шулайи касари гьарури чан хилихъ хъайи манат уртахъди кивну, гъуншйир вари сатIи духьну, ушв гьибтбан серенжем тешкил апIури шубуд-юкьуд йис вуйич. Мидиз улихьна йисариси дарди, цци иштирак гъахьидарин ва кюмекнан хил гьачIабккдарин кьадар лапра гизаф вуйи.
Гьадрарин арайиъ тазади ислам дин кьабул дапIнайи урус риш Натальяра а. Гьяятдиъ гъуншйир вари сатIи духьну ушв гьибтрайивалин серенжемдин гьякьнаан дугъу чан фикрар ачухъ гъапIну.
«Кьюд йис улихьна узу Санкт-Петербургдиан Дагъустандиз удучIвну гъафунза. Мушваъ айи культура, аьдатар, машкврар къаршуламиш апIувал гъябкъган, жара дюн’я вуйиганси мюгьтал гъахьунзу. Хъа Рамазандин вазли мушваъ яшамиш шулайи инсанарин арайиъ айи сабвали йиз кIвак гьевес капIну. Ццийин Рамазандин ваз йиз Дагъустандиъ яшамиш шулайи уьмриъ кьюбпиб вуйиз. Сач узуз му вазлин арайиъ гъахьи гьядисйир гъяркъган, кIулиз ислам дин кьабул апIбан фикрар гъафнийиз. Магьа сад йислан узура, Аьльгьямдулиллагь, мусурман гъахьунза.
Сачси, ццира, гъуншйир вари сатIи духьну, ушв дибиснайи касариз гьяятдиъ уьл гьивуз столар ккабалгунча. Мушвахьна гъуншйир, дустар, бицIидар вари сатIиди дуфну, саб хизанси разивалиинди ушв гьибтбан серенжемдиз ккилигурайи. Уч духьнайидариз лигури дийигънайи узура, гьадрарикан сар вуйивалиан разиди, жандиъ зиз арабгънайивализ. Валлагь, инсанарин арайиъ мициб сабвал ва гьюрмат узуз йиз уьмриъ зат гъябкъюб дариз. Гьамус йизра кIваъ сабур айиз», – гъапнийи йиз гъунши Натальяйи.
Ушв гьибтбан серенжем гакIвлар ккитрайи пичриин 200-тIан артухъ касариз аш апIру аьхю гъазан иливну, гьаддиъди кумран ниъра хъайи иццциб аш апIбалан ккебгъра. Аш апIуз хусиси кьасабар хъади гъюра. Хъа имбуну вари ляхнар гъуншйири варидари сатIиди апIура.
