Мейлан Нежефов

Абурлуди уьли гъапнийи арсраз:
Гъизил фукьан гьисаб дапIнашра заан,
Йиз улихьна гъибди думу сад йигъан,
ВартIан исди узуз апIури икрам…
Ш. Къазиев

 

Гьар йисан 27-пи январи ихь уьлкейиъ Ленинград шагьрилан блокада алдабгъу йигъ вуди мектебариъ, библиотекйириъ, бицIидарин багъариъ ва культурайин хулариъ кIваин уьбхбан акцйир, ачухъ дарсар, классдин гъирагъдихь урхбан дарсар, шиклар зигбан ва цалин газатар каъбан серенжемар кIули гъахура.

Хиварин «Ромашка» кIуру бицIидарин багъдиъ тербиячиди лихурайи Саяд Везировайи блокадайин уьлкан набалугъариз кьатI’иди ктибтнийи.
«Му гъагъи вахтна гьарсар агьалийин кIулихъ туври гъахьиб 125 грамм уьлин чIукI вуйи. Гьадму аьгьвалат 872 йигъан ва йишван давам шули гъабхьну. Мурар гьаци ичIи гьисабар дар, мурар гьадму блокадайиъ гъахьидарин уьмрин аьхю читинвалар атIагура. Саб миллионна хьудварж агъзур инсанар дявдин цIин вахтари гаш’валин ва дарвалин аьзиятнаан уьмриан гъушну. Гьадрарин арайиъ учвусдар бицIидарра цIиб адайи. Гъира ихь халкьдиз гьадму кIару уьлин кьацIнаъ блокадайин гъам-зиллет гъабхьи халкьдин сурат гьибгъри гъубзра. Дуствал, сабвал, албагувал, мясляаьт халкьарин варитIан аьхю девлет ву. Гьаци гьадму девлетну, душмандиин гъалибвал гъазанмиш дапIну халкьарин арайиъ ислягь уьмур гъурмиш гъапIну. Думу йигъар кIваз дерин тясир апIрудар, кIвак гъалабалугъ кипрудар ву. Гьаддиз думу гъамлу йигъарикан ухьу кIваълан гьархну ккундар, дустар», – гъапнийи бицIидариз презентация къайдайиинди кIули гъубху чан дарснаъ Саяд Везировайи.
Мидланра савайи, тербиячийи чав бицIидарихъди йигъар ккимиди гьязур дапIнайи бицIи сягьнара улупнийи. Дугъриданра, бицIидар гьадму вахтнан кIалибнаъ учIвнайи. Талонар хилиъ ади, нубатнаъ дугъужвну, граммариинди терезарихъ хъайирихьан кIару уьлин кьацI гъадабгъури, дурари тясир апIру гьиссариинди шиърар урхруган жандилан зиз гъябгъюйи.
Гъит ихь бицIидарин гележег акуб ибшри!