Гюльнара Мягьямедова
Эскервалин машгьурвалин йигъаз бахш вуди, 27-пи январи вари Урусатдиъ гъябгъюрайи «Блокадайин уьл» кIуру кIваин уьрхбан акцияйиъ Мягьячгъала шагьурра иштирак гъабхьну. Думу акция тешкил гъапIдар Мягьячгъалайин администрация ва Дагъустандин жигьиларин ляхнариз лигру министерство ву.
Волонтерари шагьрин кючйириъ Ватандин Аьхю дявдин йисари Ленинграддин агьалйириз блокадайин варитIан гъагъи йигъари туври гъахьи 125 грамм уьлин тикйир пай гъапIнийи. Пай гъапIу уьлин тикйирихъ Ленинграддин агьалйирин дурумлуваликан, шагьур уьбхюри гъахьидарин дирбаш’валикан ва Урусатдин тарихдиъ думу вахтна гъибту дерин мянайикан ктибтурайи кагъзарра хъайи.
Акцияйин метлеб Ленинграддин агьалйирин кьягьялваликан ва рюгьнан ижмиваликан, дурари фукьан аьхю кьиматниинди ва жанар фида апIбиинди Ватандин азадвал гъюбхнуш гьаддикан гъийин наслариз ктибтуб вуйи.
Ленинграддин блокада 872 йигъандин арайиъ давам гъабхьнийи. Диди миллионтIан зиина агьалйирин уьмрар пуч гъапIну. Ленинград инсанарин дурумлувалин, Ватандихьна вуйи ккунивалин, вафалувалин лишан гъабхьну.
