Наргиз Гюлечова
15-пи августдиан 22-пи августдизкьан Екатеринбургдиъ боксдиан Урусатдин чемпионат кIули гъубшну. Му жюрейин чемпионат 34-пи ражну гъябгъюрайиб ву. Ццийин талитар Ватандин Аьхю дявдин 80 йисаз ва Совет уьлкейин маршал Георгий Жуковдин рюгьназ бахш дапIнайидар вуйи.
Боксдиан вуйи му чемпионатдиъ ихь уьлкейин 60 региондиан 300-тIан артухъ спортсменар иштирак гъахьнийи. Гьадрарин арайиъ Дагъустандианра хайлин боксерар айи.
Гьяфтайин арайиъ кIули гъушу талитариъ Дагъустандиан вуйи боксерарин команда кIакIначи гъабхьну, хъа 11 медаль гъадагъу спортсменарикан улхуруш, дурарикан 3 спортсмен Урусатдин чемпионар гъахьну. Дурар 5 ражари уьлкейин чемпион гъахьи Муслим Гьяжимягьямадов (92 кг), 4 ражари чемпион гъахьи Жамбулат Бижамов (80 кг) ва 3 ражари чемпион гъахьи Шарабутдин Атаев (86 кг) ву.
Гьацира чемпионатдиъ Расул Салиев (51 кг), Расул Мягьямадов (63,5 кг), Ил’яс Мягьямедов (80 кг), Рамазан Дадаев (92 кг) – арсран медаларин ва Арсен Шамшидов (67 кг), Аьлихан Янгизбаев (71 кг), ЧIеэрав Ашалаев (80 кг), Тимур Гьямзатов (86 кг) – кемшрин медаларин сагьибар гъахьну.
Къайд дапIну ккундуки, сабпи йишвар гъадагъу шубрид спортсменарра Урусатдин командайиъди декабрин эвелариъ Абу-Дабийиъ кIули гъябгъру боксдиан вуйи варидюн’яйин чемпионатдиъ иштирак хьиди.
Республикайиз чемпионар хъуркьбан кьяляхъ, Дагъустандин РИА-йин конференцйир гъахру залиъ, дурарихъди республикайин журналистар гюрюшмиш гъахьну.
Конференцияйиъ иштирак шулайи Дагъустандин командайин кIулин тренер Руслан Хаировдин гафариинди, чемпионатдиъ республикайиан вуйи командайи улупу гьунарариин думу рази ву.
Ич сюгьбатнаъ республикайин спортдинна физический культурайин министрин заместитель, Олимпиадайин чемпион Гьяйдарбег Гьярдарбеговди гъапиганси, чемпионатдиъ арсран медаль гъадабгъу 20 йисандин яшнаъ айи Расул Мягьямадовди вари мюгьтал гъапIну. Финалиъ му спортсмен швнуб-саб ражари Урусатдин чемпион духьнайи Илья Поповдихъди талитназ удучIвну, дугъахь чав ккагъуз гъитри гъахьундар. Вушра дугъаз цIиб тажруба гьубкIундайи.
«Пуз ккундузузки, гьамусяаьт му жюрейин спортдиз Урусатдин боксдин федерацияйианра кюмек апIура. Магьа гьаму чемпионатдизра федерацияйиан 26 миллион манат харж гъапIнийи.
1-пи йишваз – 3 миллион, 2-пи йишваз – 2 миллион, 3-пи йишваз – 1 миллион, 4-пи, 5-пи йишвар гъадагъдаризра – 500 агъзур манат тувну. Думу боксдин федерацияйин кIулиъ айи Уьмар Кремлевдин гьунар ву», – гъапну Гьяйдарбег Гьярдарбеговди.
Конференцияйиъ иштирак духьнайи спортсменари, чпи чемпионатдихьна фукьан вахтна ва фици гьязур гъахьнуш ктибтнийи. Хъа гьамусяаьт дурар вари 15-пи сентябри Каспийскдиъ Мягьямад-Салам Умахановдин рюгьназ бахш вуди гъябгъру халкьарин арайиъ вуйи турнирихьна гьязур шула.
