Зубайдат Шябанова
Улихьна йигъари Волгоград областдин Волжский шагьриъ урус шашкйириан Кьибла ва Кафари Кавказдин федеральный округарин чемпионат ва первенство кIули гъабшнийи.
Турнирин жикъи вахтнан арайиъ уйнамиш апIру талитариъ Урусатдин ЮФО-йин республикйириан 51 спортсмен гъядягъну. Талитар швейцарский къайдайиинди 9 тур ади кIули гъухнийи. Саб талитназ, гьарсаб ходдиин 2 секунд иливури, 3 дакьикьатIан тувнадайи.
60 йис ва артухъ яш айи спортсменарин арайиъ талитариъ иштирак гъахьи Табасаран райондин искусствйирин мектебдин директор, спортдин мастер Исмяил Исмяиловди сабпи йишв гъадабгъну. Кьюбпи йишв Владикавказдиан вуйи спортдин мастер Казбек Гогичевди ва шубубпи йишв Волгограддиан вуйи спортдин мастер Иван Поминчукди гъазанмиш гъапIну.
Талитарин кьяляхъ ич сюгьбатнаъ Исмяил Исмяиловди къайд гъапIганси, чемпионатдиъ иштирак хьуз думу шашкйириан Дагъустандин сборный командайин дахилнаъли гъушнийи.
«Дагъустандин спортдин министерствойи узуз талитариъ иштирак хьуз теклиф дивну. Ихь командайин дахилнаъ 4 аьхюдар ва 5-6 живанар айи. Талитар швейцарский къайдайиинди кьюб номинацияйиз жара гъапIну: жикъи вахтнан арайиъ вуйи яриш ва асас яриш. Узу электронный тупутдиинди 9 талитна иштирак гъахьунза. Вари талитариъ гъахьи уьмуми гьисабариан варитIан заан очкйир йиздар гъахьну», – ктибтура спортсменди.
Къайд апIуз ккундузуз, Дагъустандиъ шашкйириан Урусатдин спортдин мастер анжагъ сар Исмяил Исмяилов ву. Дугъу, 2001-пи йисан, Табасаран райондин главади гъахьи Нурмягьямед Шихмягьямедовдихъди сатIиди, Дагъустандиъ шашкйириан республикайин федерация ачмиш гъапIнийи. Гьадму йисхъанмина Табасаран райондиъ гьар йисан шашкйириан 19 ражари республикайин турнирар гъухну. Думу вари турнирар райондин главйирин кюмекниинди Исмяил Исмяиловди тешкил гъапIдар ву.
«Узу 36 йисан Хючна гъулан культурайин хулан директорди гъилихунза. Гьамусяаьт Кьасум Мягьямедовдин ччвурнахъ хъайи искусствйирин мектебдин директорди лихураза. Хъа гьадму саб вахтна, шашкйир уйнамиш апIуз асиллагь аьгъдайзуз. Узу райондин культурайин хулаъ ляхниъ дийигъган, гьадина шашкйир уйнамиш апIуз хайлин агъсакълар ва жигьилар гъюйи. Думуган шашкйир уйнамиш апIбахьна маракьлувал аьхюб вуйи. Дурарихъан узура шашкйир апIуз гъудубгънийза. Агьли касар гьаммишан уз’ин гъалиб шули гъахьну. ДураритIан ужуйи дубгъуз аьшкь ади, шашкйириан аьгъювалар туврайи китабар урхури гъахьунза», – кIваин гъапIнийи бажаранлу спортсменди.
Исмяил Исмяилов шашкйириан хусуси зачетдиан юкьуб ражари Дагъустандин чемпион, командайин дахилнаъди Дагъустандин хьуб ражари чемпион, шашкйириан Кьибла Осетияйиъ гъабхьи варидюн’яйин талитариъ пешкешнан йишван сагьиб, кагъзар дикIури хътаъру шашкйирин къайдайин уйнамишариъ вари дюн’яйин финалин талитарин иштиракчи, кьюб ражари СКФО-йин чемпион гъахьну.
Гьамусяаьт Исмяил Исмяиловди ляхнин кьяляхъ пулсузди Хючна ва Ягъдигъ гъулариан вуйи баяр-шубариз шашкйириан аьгъювалар тувра. Дугъан ученикари гъи райондин ва республикайин талитариъ пешкешнан йишвар гъазанмиш апIура.
