Зубайдат Шябанова
Январин 13-пи йигъан вари Урусатдиъ чап апIбарин йигъ къайд гъапIну. Му йигъан багъри коллективдин гьарсарин хил дибисну, дурариз пишекарвалин машквар тебрик апIуз дархьиган, узу дурарикан кьюб гаф кьалмиинди пуз фикир гъапIнийза.
«Табасарандин нурар» газатдин редакцияйин вакилар чпин ляхин ккуни, багъри газатдихъан кIваантIан юкIв убгурайи, саб хизанси албагу дуствалин мюгькам коллектив ву.
Тяриф вуди кIурайиб дариз, газатдин гьарсар гъуллугъчи – текдитIан адру, хусуси ва кьатI’и фикрар айи, чIиви гаф гьисс апIуз удукьру, фунуб вушра ляхниз кьимат тувуз шлу пишекрар ву.
Йиз уьмриъ саб фикирнан инсанар, варитIан ужудар дустар узухъди сатIиди лихурайи газатдин редакцияйиъ алахьунзуз. Бязи вахтари жюрбежюр темйириан сар тмунурин фикрихъди рази дашра, уьмрин асас цирклариан саб кьатI’и фикриин дийигъурайивали коллективдин гележегдин артмиш’вал тямин апIуз кьувват тувра.
Аьхиримжи вахтари узу лап йирси гьялназ дуфнайи Журналистарин хулан дараматдиз тек-биртIан гъюри шулдарза. Хъа душваъ 11-пи мертебайиъ ерлешмиш дубхьнайи редакцияйизди багъри коллективдихьна абайин хулазси лик ивуйза. Му инсанарихъди узу йиз уьмрин вари шадвалин ва пашманвалин дакьикьйир пай ва гьял апIури гъахьунза. Хъа фукьан учу редакцияйин кабинетариъ ватандашарихъди шаду гюрюшар ва сюгьбатар кIули гъухнуш, учвура шагьидар вучва.
Гъубшу йисхъанмина редакцияйиз Журналистарин дараматдин 7-пи мертебайиъ 4 кабинет жара гъапIну. Гьамус табасаран, лезги ва цIахур халкьарин милли газатарин коллективарин вакилар саб мертебайиъ лихура. Табасаранар варидарихъди юла гъярудар, дуствалин жилгъа яркьу ва ужуб рякъюз илтIибкIрудар ву. Гьаци ву гьамусяаьт 7-пи мертебайиъра. Хъа дурари чпин варитIан асас метлеб – багъри газат уьбхюб, думу артмиш апIуб ва гележегдиз гъабхуб – абйирин васият ва буржи вуди гьисс апIура. Дурариз му ляхниъ учву, ихь багъри табасаран ватандашари, аьхю кюмек туврачва.
КIулди газат редакцияйиъ лихурайи гъуллугъчйирин варидарин сабси гъабхурайи уьмуми ляхнин натижа ву. Дидин гьарсаб нумрайиъ коллективдин гьарсар вакили чан рюгь ва чан юкIв ивра.
Магьа, мисалназ, Гюльнара Мягьямедова гъадагъурхьа. Думу политикайин отделин редактор ву. Гьякьикьи дагълу табасаран дишагьлийин сурат намуслуди уьбхюрайи, дугъри фикир айи Гюльнарайи арабир вахтари жара газатарин мухбирари саб вазли апIру ляхин саб нумрайиз гьязур апIуру.
Хъа мухбирарин текстар стилистикайин ва грамматикайин цирклиан кIалибназ хурайи Шарафудин Закиевич таниш дару кас Журналистарин хулаъ гьичра адаршул. Думу газатдин философси, машгьур инсанпересси гьисаб апIураза. Дугъахъди сейирназ гъягъюзра, инсаниятдин бинайикан, динарикан, чIаларин, нугъатарин къайдйирикан ва тафавутлуваларикан, ясана фунуб ккуш жара темайиан сюгьбатар апIузра маракьлуди шулу.
Наргиз Гулечова кIулди Дагъустандилан сад йигъан илдицишра, швнуб саб машквраъ вая серенжемдиъ иштирак гъахьишра, учв дурцнайиб аьгъю апIрур дар. Думу инсанар ккуни ва варидарихъди гаф абгуз аьгъюр ву. Дугъаз «коллективдин юкIв» кIури шулу. Дугъриданна, узуз гъийиз багъри газатдихъан мици кIваантIан ва ачухъди юкIв убгурайи кас гъяркъюндарзуз.
Рягьимлу юкIв айи Эльмира Багъдаевайин версткайиинди газатдин нубатнан номер арайиз гъюра. Бязи вахтари 20 процентра гьязурди адру газат дугъу, устад халачачийиси, сад йигъандин арайиъ газатдин гьарсаб маш тартиб дапIну, гьарсаб макьала шиклариинди ккабалгну, чапдиз гьязур апIуру.
Хъа Дербент ва Дагъустандин Огни шагьрариан, Дербент, Табасаран ва Хив районариан вуйи хабрарихьди ухьу Мейлан Нежефовдина Умгьанат Сулеймановайи таниш апIура.
Магьа отделарин редакторарин кабинетдин раккин абццну, редактор Гюлягьмад Маллялиев учIвну. Коллективдин арайиъ учу дугъаз Нуралиевич кIурача. Дюзди гъапиш, узуз Нуралиевичси сабур айи инсан гъяркъюндарзуз. Арабир редакцияйиз гъюрайи гьязур дару макьалйир, къайдасуз ихтилатар, мешребсуз шиклар тартиб дапIну, дугъу дурарикан варидариз урхуз аьшкь гъюру маракьлу макьалйир гьязур апIуру. Мидланра гъайри, редактори редакцияйин гьарсар вакилин теклифарин, кьастарин, фикрарин тереф уьбхюру ва думу планар кIулиз адагъуз чавра кюмек тувру.
Узу гъи улупу «Табасарандин нурар» газатдин коллективдин бязи вакиларихъди учвура багахьди таниш вучва. Дурар кми-кмиди багъри районариъ гъягъру серенжемариъ, телефон, ручка, дафтар вая диктофон хилиъ дибисну, рякъюри шулчвуз. Серенжемариъ, совещанйириъ, концертариъ жара инсанари тамаша апIурайи вахтна, журналистар думу серенжемарикан вари ихь халкьдиз мялумат тувуз ва дидкан шлубкьан ухди хабар тарабгъуз гъайгъушнаъ шулу.
Узу «Табасарандин нурар» газатдин коллектив журналистарин пишекарвалин йигъахъди тебрик апIури, гележегдиъра дурариз багъри халкь газатдин даягъ ва кьувват хьувал, юкIв шад апIру ужудар хабрар артухъ тарагъувал ккун апIураза. Гъит, гьаци ибшри!
