Мейлан Нежефов
Саки вари Урусатдиъси, Хив райондиъра гьар йисан июндин шубубпи элгьет йигъан медицинайин гъуллугъчйирин йигъ къайд апIуб аьдатнаъ абхъна.
Гьаму йигъари райондин агьалйирин ва администрацияйин терефнаан пишекарвалин йигъ тебрик апIури, райондин глава Ярмет Ярметов ЦРБ-йин актовый залиъ духтрарихъди гюрюшмиш гъахьнийи.
«Гьюрматлу дустар, вари райондиъ му баркаллу ляхниъ лихурайи 302 ичв гъарашугъариз пишекарвалин йигъ марцци кIваан тебрик апIуз ккундузуз. Дугъриданра, мялимарин кьяляхъ учвура хътарчва. Иццрушну ккагънайи гьарсар бейнавайин кIваъ учIвну, дугъан дердназ дарман абгури, сагъламвалин гъаразнаъ айи учвуз икрам апIураза. Ав, ихь арайиъ гьадму коронавирус уьзур тарабгънайи вахтна йигъ-йишв дарпи ва жвуван жанар гьяйиф дарапIди учву гъизигу зегьметнакан кIваин дарапIди гъибтуз шулдарзухьан. Хъа гъийин йигъкан улхруси гъабхьиш, магьан хусуси метлеб айи дявдин операцияйиан зийнар духьну дуфнайидар аьзарханайиз илтIикIайиз ккилилигди, дурарин гъуллугънаъ ва гъайгъушнаъ айивализ, дурарихьди умудлуди закурин йигъ гюзетмиш апIуз гъитрайивализ учвуз гьаруриз кIул’инди аферин! Хъана учвкан ккун апIураза гьамци мар-цциди, жвуван ччвурназ лайикьлувалиинди ва намуслувалиинди лихувал давам апIуб», – гъапнийи чан улхбаъ райондин кIулиъ айири.
Гьацира, гюрюшдин аьхириъ чпин ляхниъ заан хъуркьувалар улупу гъуллугъчйир райондин администрацияйин гьюрматнан кагъзариинди, кюкйириинди ва пешкешариинди лишанлу гъапIнийи.
