Зубайдат Шябанова
Дагъустан, Кавказ, Урусат ва вари дюн’я гьаму йигъари США-йин Нью-Йорк шагьриъ гъубшу Ислам Махачевдин ва Австралияйин машгьур спортсмен Джек Делла Маддаленайин кчIихбариан UFC 322-пи турнириз ккилигури гъахьну.
Гьябиб Нурмягьямадовди къайд гъапIганси, му кчIихбар, Исламдизси, дурарин вари командайизра лап важиблудар вуйи. «Ич командайин тарихдиъ варитIан аьхю талитар багахь шула. Исламди кьюбпи чIул гъадабгъуз талитар гъахуру. Му ич мелзниин али «Адашдин план» ву. Йиз фикриан, уз’ан тренервалин ляхин ужуди гъабхуз удукьуразуан. Ихь вари баяр гъалиб шула, варидарикан, улихьна душну, машгьур спортсменар шула. «Мэдисон Сквер Гарден» аренайиин тарихдин кчIихбариъ Ислам гъалиб хьайиз аьгь апIуз шуладарзухьан», – гъапну Гьябиб Нурмягьямедовди кчIихбар ккергъайиз улихьна.
Делла Маддаленайихъди кчIихуз октагондиъ Махачев UFC-йин 14-пи талитариз Гьябиб Нурмягьямадовди тIаъру. Улихьдин кчIихбариъ му ляхин дурарин тренер Хавьер Мендесди тамам апIури гъахьну.
Магьа талитар гъахьи йигъан Ислам Махачев, Урусатдин спортсменарин арайиъ сарпир вуди, UFC-йин талитариъ жюрбежюр гъагъарин категорйириъ кьюб ражари чемпион гъахьну. Думу Джек Делла Маддаленайин зиин гъалиб гъахьимитIла, Гьябиб Нурмягьямадовди, UFC-йин кIулиъ айи Дана Уайтдихьан кьюбиб чIуларра чахьна гъадагъну ва, Ислам Махачевдин мухриин илирчну, думу чан гугахъна за гъапIну. Дюн’яйиъ спортдин кчIихбариан варитIан машгьур талитар гъахру Нью-Йоркдин залиъ тамашачйирин гьевеслу сесер-гьарйир яваш апIуз даршули гъабхьнийи.
Талитар ккергъайиз Мадда-ленайик яман кьуцIнивал ва гьевес кади гъабхьну. Дугъу пресс-конференцйириъ, дудуркьну дийигъбаъра, йивбан техникайиъра, кчIихбариъра ИсламтIан учв дирбаш вуза, кIури гъахьну. Амма сабпи раунддиъ Махачевди Джекдин лик илбицну, думу рягьятди партериз гъухган, натижа фициб шулуш мялум хьуз хъюгъну. Талитарин юкьуб раунд саб тмунубдиз ухшар вуйидар гъахьну. Ва аьхиримжи раунддиъ Махачевди Маддалена хъана кIанакк ккитну. Исламди Австралияйин ва вари дюн’яйин машгьур спортсмендиз чаин гъалиб хьуз саб жюрейинра мумкинвал гъибтундар. Гьамци 34 йисаъ айи Ислам Махачев 18 гъалибвал айи Маддаленайиин, гьадмугандиз улихьна UFC-йин талитариъ 22 гъалибвал гъадабгънайи Алекс Волкановскийиин, 12 гъалибвал айи Армен Царукяндиин ва 11 гъалибвал айи Чарльз Оливейрайиин гъалиб духьну, дюн’яйиъ сабпи жергейиъ айи варитIан дирбаш спортсменарин сиягьдиъ учIвну.
«Гьаму кьюб чIул йиз уьмрин варитIан аьхю кIван хиял вуди гъабхьнийиз. Гьамус узу жвув бахтлу кас вуди гьисс апIураза. Му чIулар гьадмукьан гъагъидар вуки, амма гьаци вушра баладар, узу рази вуза. Жара гъагънан категорияйиз удучIвган, йиз уьмриъ хайлин дигиш’валар гъахьну. Амма гьациб кьувват гьисс апIуразаки, хьуб раунддин талитар рягьятвал гъададабгъди гъахуз шулзухьан. Гьаддиз Маддаленайихъди вуйи кчIихбарра читинди алахьундарзуз. Узухъди кчIихбариз удучIврудариз варидариз, узу октагондиъ фицир вуш, аьгъя. Къаршуди сарихьанра дийигъуз шуладар. Дональд Трамп, абцц Лизи хал, узу гъюраза», – гъапну Махачевди кчIихбарин кьяляхъ октагондиъ имиди.
Дугъан му гафар гьаци зиълан гъапидар дайи. Улихьнаси США-йин президентди 2026-пи йисан UFC-йин турнир Лизи хулан аьтрафариин гъабхбан теклиф дивнийи. UFC-йин президент Дана Уайтдин му планар кIулиз удучIвури гъахьиш, варитIан гужли спортсменар чиб-чпин арайиъ талитариз адаъруваликан гъапну.
«Хайлин спортсменари, чпи варидюн’яйиз машгьурвуйидар шулуча, кIури шулу. Амма варидариан удукьурадар. Узуз Аьбдулманапдин гафар гьархударзуз. Дугъу узуз, цIийина Гьябиб, хъа дугъан кьяляхъди Ислам вари дюн’яйиз машгьур шиди, гъапнийи», – къайд гъапIну пресс-конференцияйиъ Дана Уайтди.
Гьябиб Нурмягьямадовдин адаш Аьбдулманап Нурмягьямадовдиз Гьябибдихъди сабси саб залиъ спортдиан аьгъювалар туври гъахьи чан ученик Исламдин мумкинвалар рякъюри гъахьнийи. Чан аьхиримжи интервьюйиъ дугъу гьамци гъапну: «Узу йиз улихь сабсана важиблу месэла дивназа. Узуз чIул гъадабгънайи сарсана чемпион ккундузуз. Исламдиз дицистар мумкинвалар а. Дугъу ухьуз дурар улупиди».
Гьябиб ва Ислам бицIивахт-нахъанмина чиб-чпиз танишар вуйи. Дурари саб мектебдиъ, хъасин Аьбдулманап Нурмягьямадовдин саб спортклубдиъ сатIиди аьгъювалар гъадагъури гъахьну. Ислам ужуб хасиятнан, кюмекназ гъюру ва варидариз гьюрмат айи жигьил ву. Гьябибди аьхиримжи талитарин кьяляхъ къайд гъапIганси, команда улихь гъябгъюра. Гьарсаб талитнаъ гъалибвал гъадабгъбан бадали, дугъан командайин спортсменар гьар гвачIнин ва гьар хябяхъган спортзализ гъюра. Хъа гъи дугъу ихь спортсменарин улихь диврайи теклифариз гъилигиган, асас талитар гьеле шуз ими.
Махачевдиз цIийи гъагънан категорияйиъ къаршуди удучIвру машгьур спортсменар хайлиндар а. Хъа дурар вари Исламдинна кьюб чIул гъадагънайи сарсана спортсмендин – гьамусяаьт пучIу дивизиондин спортсменариз гучI ккипнайи Илия Топурияйин – арайиъ шлу талитариз ккилигура. Мидланра савайи, Грузияйин спортсмен Топурияйи Махачевдин гъалибвалин гьякьнаан гьюрматсуз комментарий тувну.
«Ислам, увуз тренировкйириъ гъадабгъуз даршлу саб шейъ лазим вувуз – гьисслувал. Гьаму талитариъ варитIан тIагърушин капIруб увуна яв кчIихбан къайда вуйи. Узу уву октагондиъ нивкIуз гьаърувалиин йигълан-йигъаз артухъ умудлу шулаза», – гъибикIну Топурияйи.
Дугъриданна, Махачевдинна Топу-рияйин арайиъ кчIихбар гъахьиш, дурар UFC-йин тарихдиъ варитIан маракьлудар гьисаб апIуру. Думу талитар шулуш-шулдаш, спортсменарин гьиссарилан ва ниятарилан асиллу ву. Хъа сабан ухьу Урусатдиъ сарпир вуди UFC-йин кьюб гъагъишнан категорйириан чемпионвалин чIулар гъадагънайи пягьливнин гъалибваликан неззет ктабгъурухьа.
