Зубайдат Шябанова
Гьаму йигъари Табасаран райондин кIулиъ айи Мягьямед Къурбановдин ччвурнахъ 43057-пи эскервалин частнан командир полковник Р. Бзыковдихьан Хючна гъулан агьали Эйваз Мягьямедовдиз чухсагъул мялум апIурайи кагъаз гъафну.
Старшина Эйваз Мягьямедов улупнайи частнаъ мотострелковый 3-пи батальондин танкариз къаршу взводдин операторди контрактдин къайдайиинди гъуллугъ гъабхурайир ву.
Эскервалин частнан командир, полковник Р. Бзыковди чан кагъзиъ эскер Эйваз Мягьямедовди женгнаъ улупурайи игит ва дирбаш дюшюшарикан саб ктибтну: «2024-пи йисан 14-пи июли танкариз къаршу взводдин оператор старшина Мягьямедовди штатдин яракьдиан йивури, чпин взводди дидиснайи йишвариина цIа уьлюбхнайи беспилотный «камикадзе» жюрейин тIибхру кьюб аппарат дагъитмиш гъапIну.
Старшина Эйваз Мягьямедовдин арайиз дуфнайи аьгьвалатнаан кIул адабгъуз аьгъювали ва заан пишекарвали дугъаз чахъди хъайи хайлин баярин уьмур уьбхюз кюмек гъапIну. Эйваз Шиховичдин дирбаш ва кьатI’и гьяракатар игитвалси гьисаб апIурача. Думу багъри Ватандин кьягьял эскер ва дугъри ватанпервер ву. Эйваз Мягьямедов Жуковдин медалиинди лишанлу дапIна ва дугъан ватандашарихьан, багахьлуйирихьан, таниш касарихьан дугъ’инди дамагъ апIуз шулу. Дугъриданна, думу Урусатдин варитIан дирбаш баярикан сар ву».
Табасаран райондин глава Мягьямед Къурбановди къайд гъапIганси, гьаму жюрейин кагъзар дугъура, эскрарин абйир-бабарира кми-кмиди гъадагъура, ва дурар аргъаж шулайи наслиз ухьу дамагъ апIру нумунади улупуз шулу. Дурарикан сар Эйваз Мягьямедовра ву.
Райондин главайи ватан уьбхюрайи вари эскрариз ва дурарин абйир-бабариз мюгькам сагъвал, хушбахтвал ва багахь гележегдиъ сагъ-саламатди чпин хизанарихьна гъалибвал гъадабгъну гъювал ккун гъапIну.
