Зубайдат Шябанова
Украинайиъ хусуси метлеб айи операцияйиъ иштирак шулайи хусуси полкнан 134-пи урхбанна тренировкйир гъахбан дестейин (УТГ) командир, полковник А.А. Самсоновдихьан Табасаран райондин глава Мягьямед Къурбановдин адресназ Чухсагъулин кагъаз гъафну.
Кагъзик гьамци дибикIна: «Гьюр-матлу Мягьямед Сиражудинович! хусуси моторизованный полкнан 134-пи УТГ-ин командованиейин ччвурнахъан Донецкдин терефнаъ хусуси метлеб айи операцияйиъ иштирак шулайи ичв ватанагьли аьхюну сержант Керимов Мягьямед Алагьвердиевичдин вафалувализ ва ватанпервер тербияйиз кIваантIан чухсагъул мялум апIурача.
Гъи дугъу бандерайин нацистарихьан ислягь ватандашар, дишагьлийир ва бицIидар, Ватандин Аьхю дявдин ветеранар ва агьли касар уьрхюри, Ватанди чан улихь дивнайи вазифйир, хилиъ яракь дибисну, намуслувалиинди тамам апIура.
Эскервалин гъуллугънан читинвалариз дилигди, учву туврайи ватанпервер тербия ва кюмек себеб духьну, Мягьямед Алагьвердиевич, Урусатдин милли маракьар уьрхюри, гьюкуматдин, чан хизандин, багахьлуйирин ва мирасарин ихтибарлу даягъси гъузра.
Ихь Ватандихьан дугъ’инди дамагъ апIуз шулу. Абйирин игитвалариинди дибикIнайи эскервалин баркаллувалин ва машгьурвалин тарих йислан-йисаз деврин наслари яркьу апIура. Гьаци ичв ватанагьлийин уьмрин рякъра гележегдин наслиз лайикьлу ватанпервервалин нумуна вуди гъубзди. Ватан уьбхюрайи вари ичв баяриз хъуркьувалар ишри ва дурар кIван мурадарихъ хъуркьри. Хъа учвуз мюгькам сагъвал, хушбахтвал ва ислягьвал ккун апIурача!»
Керимов Мягьямед Алагьвердиевич (шиклиъ) Хючна гъулаъ бабкан гъахьну. Дугъу Хючна гъулаъ 1-пи нумрайин мектеб ккудубкIну ва Мягьячгъала шагьриъ ДГИНХ-диъ пишекарвал гъадабгъну. 2008-пи йисхъанмина Мягьямед, контрактдиинди гъуллугъ гъабхури, Каспий фтотилияйиъ, Чечен Республикайиъ гъилихну, хъа гьамусяаьт Мягьячгъалайиъ Росгвардияйиъ а. СВО-йиз думу кьюбпи ражну гьаъна.
Табасаран райондин глава Мягьямед Къурбановди чан терефнаан Мягьямед Керимовдин абйир-бабариз чухсагъул мялум гъапIну.
«Ихь ватандашарикан гьамцдар ужудар гафар кайи кагъзар учу кми-кмиди гъадагъурача. Ватандин улихь ихь баяри чпин гъуллугъ намуслувалиинди ва игитвалиинди гъабхурайивалиин рази ва шад дархьиди гъузуз шулдар. Мягьямед Керимов дугъриданра, аргъаж шулайи наслиз намуна ву ва ухьу дугъ’инди дамагъ апIурахьа. Веледариз ватан ккун хьуз гъиту ва ватанпервер тербия туву дугъан ва СВО-йиъ айи ихь имбу эскрарин абйир-бабариз аферин ва чугъсагъул!», – гъапну райондин главайи.
