Гюльнара Мягьямедова
Октябрин 4-пи йигъан «Дагъустандин правда» газатдин конференцйир гъахру залиъ Дагъустан Республикайин военный комиссар Дайтбег Мустафаев республикайин СМИ-йин вакиларихъди гюрюшмиш гъахьну ва октябрин I-пи йигъан ккебгънайи чвлин призывдикан сюгьбат гъубхну.
«Урусатдин Федерацияйиъ чвлин призывдин дахилнаъди 18 йислан 27 йис’ина яшар вуйи 130 агъзуриинакьан ватандашар армияйиз гъягъиди. Му кьадар гьаму йисан хьадукра армияйиз гьаъдартIан 17 агъзур касдин цIиб ву. Республикайиан 3 агъзурна 500-тIан артухъ жигьилар чпин ватандаш’валин буржи тамам апIуз гъягъиди. Чвлин призывдин дахилнаъди армияйиз гьаърайи баярин кьадар 2023-пи йисан хьадукра гьаъдартIан цIибди ву», – къайд гъапIнийи Дайтбег Мустафаевди.
Дугъу гъапиганси, 15-пи октябриъ призывникарин сабпи десте армияйиз рякъюъ тIаъбанди ву. Дагъустандиан вуйи жигьилари, Луганскдин, Донецкдин халкьдин республикйир, Херсонский ва Запорожский областар ктарди, дявдин вари округариъ ва Кафари флотдиъ гъуллугъ апIиди.
Дагъустан Республикайин Главайин табшуругъниинди республикайиъ шагьрарин округарин ва муниципалитетарин районарин призывдин комиссйир ляхнихъ хъюгъна. РД-йин призывдин комиссияра кади, призывдин 53 комиссия тешкил дапIна. Комиссйирин дахилнаъ Правительствойин, Урусатдин ДОСААФ-дин, сагъламвалин министерствойин, образованиейин министерствойин, РД-йин Главайин багахь хьайи агьли касарин Советдин, эскрарин дадйирин комитетдин, спортдин министерствойин, республикайин юстицияйин министерствойин ва РД-йин омбудсмендин ихтиярарин Уполномоченныйин вакилар а.
Гьацира Дайтбег Мустафаевди, гьаму йисан 1-пи октябрилан башламиш дапIну, эскервалин гьисабназ гъадагъбан цирклиан къанундиз тялукь вуди кьуватнаъ учIвнайи дигиш’валариканра гъапнийи.
Асас себеб адарди, улупнайи вахтна военкоматдиз дарфиш, 10 агъзур манатдилан 30 агъзуриинакьан журум апIиди, улихьна думу журумдин кьадар 500 манатдилан 3 агъзуриинатIан дайи. Армияйиъ гъуллугъ апIуз буржлу вуйири учв Урусатдиан 6 вазлизтIан артухъ вахтназ удучIвну гъягъбакан военкоматдиз мялумат тутрувиш, дугъан 5 агъзурилан 15 агъзур манатдиина журум апIиди. Медицинайин ахтармишариккан кIул ккадабгърударин 25 агъзур манатдиинакьан журум апIиди.
Пресс-конференцияйин аьхириъ РД-йин военный комиссари къайд гъапIганси, призывдиинди гъуллугъ апIбан ерина эскрихьан сад йисан контрактдиинди гъуллугъ апIувал ктабгъуз шулу.
Улихьна йисариси гьамусра, чвлин призыв декабрин 31-пи йигъазкьан давам хьибди.
