Гюльнара Мягьямедова
30-пи октябриъ Дагъустандин Глава Сергей Меликовди Республикайин призывдин комиссияйин заседание кIули гъубхну.

 

Гьял дапIну ккуни месэлйирин арайиъ жигьилар сад йисазди армияйиз гъахбан, контрактдиинди вуйи гъуллугъназ ватандашар гъядягъбан ва «Каспий» батальондиз чпин хушниинди ватандашар кьабул апIбан суалар айи.
Дагъустандин военный комиссар Дайтбег Мустафаевди ццийин йисан октябрин эвелиан декабрин аьхириз гъябгъюрайи чвлин призывдин гьякьнаан мялуматар тувнийи. Дугъан гафариинди, ляхин улупнайи пландиз тялукь вуйи къайдайиъди гъябгъюра. Армияйиз гьаърайи призывникариз лазим вуйи вари алатар гьязурди а.
«Призывдин сабпи вазлин арайиъ республикайин улихь дивнайи пландин гьацI пайтIан артухъ тамам гъапIну. Шагьрариъ ва районариъ айи призывдин яшнан жигьилари региондин улихь дивнайи месэла вахтниинди ва заан ерийиинди тамам апIуз мумкинвал тувра. Къайд апIуб лазим вуки, армияйиз гъягъбаккан кIул ккадабгъру жигьилар, цIийи къанундиъ улупнайиси, административный, гьацира уголовный жаваблдарвалихъна хиди», – гъапнийи республикайин военкомди.

Гьарганси, гьаму ражнура Дайтбег Мустафаевди, призывникар СВО-йин зонайиз, уьлкейин цIийи регионариз гьадраъруваликанра гъапнийи. «Гъубшу йисан армияйиз гъушу жигьилар, чпин хизанарихьна кьяляхъ дуфну, чпи яшамиш шулайи йишваъ воинский учетдиъ дийигъура», – гъапнийи дугъу.
Чан улхбаъ Дагъустандин военный комиссари призывдин ляхнариъ кьяляхъ гъузнайи районар ктухнийи.
Сергей Меликовди гьадму месэлайин гьякьнаан муниципальный призывдин комиссйирикан, жямяаьтлугъ тешкилатарикан ляхин гужли апIуб ккун гъапIнийи. «Хьадукран призывдин месэла ухьу ужуди тамам гъапIнийхьа. Гьамусра призывникар военный комиссариатариз гъюбан ляхин тешкил дапIну ккунду. Ичв регьберваликк ккайи аьтрафариин гюзчивал гъабхуз ва ляхин лазим вуйи къайдайиинди тешкил апIуз вари ихтиярар ва мумкинвалар ачвуз. Бязи районариъ (Казбековский, Табасаран, Хасавюрт) главйири айи камивалар дишлади гьял дапIну арайиан адагъура, хъа гизаф йишвариъ ляхниз фикир туврадар», – гъапнийи Сергей Меликовди.
РД-йин ХатIасузвалин советдин секретарь Мягьямед Баачиловди ватандашар контрактдиинди военный гъуллугъназ гъядягъбакан мялуматар тувнийи. Гьаци, контрактникариз ва дурарин хизанариз туврайи яшайишдин рягьятваларикан мялуматар туври, республикайин агьалйир гъаврикк ккаъбан ляхин гъабхура.

Гьаму йигъари Дагъустандиъ чпин хушниинди СВО-йин зонайиз душнайи «Терек» бригадайин дахилназ гъадабгъру «Каспий» батальон тешкил дапIну ккудубкIну. Сергей Меликовди батальон арайиз хувалиъ иштирак гъахьи муниципалитетарин главйириз чухсагъул мялум гъапIнийи.
«Дагъустандиъ чпин хушниинди СВО-йин зонайиз гъягъюз гьязур вуйи ватандашарикан ибарат вуйи батальон тешкил дапIна. Батальон алабхьру палатдихъди ва жара алатарихъди тямин дапIнахьа, 1-пи ноябриъ дурар военный гьязурлугвалар гъахру лагериз гъягъиди. Мидланра савайи, уьлкейин цIийи регионарикан сабдиъ дурар ерлешмиш шлу пункт улупна. Спонсорари туву пулин кюмекниинди думу пункт гьарсабдихъди тямин апIиди. Гележегдиъ муниципальный образованйирихъди сатIиди чпин хушниинди эскервалин гъуллугъназ душнайи жигьиларин тереф уьбхидихьа. Думу батальондиз ухьхьан «Ляхин апIинай, чвйир!» пуз шулу», – заседаниейин натижа гъивнийи Дагъустандин Главайи.