Зубайдат Шябанова
Гьаму шиклиъ учвуз рякъюрайир Табасаран райондин НичIрас гъул’ан вуйи Мягьямед Мукаилов ву. Дугъу чпин гъулан мектебдин 7-пи классдиъ урхура. БицIи вахтнаанмина Мягьямед шахматар уйнамиш апIбиин юкIв алир ву. Мектебдиз гъягъяйиз дугъаз шахматар уйнамиш апIуз чан аьхюну чве Рамазанди, хъа мектебдиъ чан сабпи мялим Зиявудин Хайирбеговди улупну.
Гъи Мягьямеддин гъалибваларин кюсейиъ йицIбариинди медалар ва кубкйир а. Гъубшу йисан ноябрь вазли дугъу шахматариан СКФО-йин талитариъ кьюбпи йишв гъазанмиш дапIну, Урусатдин первенствойин финализ удучIвну. Хъа гьаму йигъари дугъу Мягьячгъала шагьриъ Е.А. Карповдин ччвурнахъ хъайи республикайин шахматарин мектебдиъ бицIидарин ва живанарин арайиъ вуйи Дагъустандин кубокдиъ сабпи йишв гъадабгъну.
Талитарин кьяляхъ узу Мягьямеддихъди ва дугъан адаш, НичIрас гъулан мектебдин директор Ризван Мукаиловдихъди сюгьбат гъубхнийза.
«Дугъустандин кубок бадали вуйи талитариъ республикайин 100-тIан артухъ бицIидар иштирак гъахьну. Дурар яшариз дилигну (9, 11, 13, 15 йис) 8 дестейиз жара гъапIну. Талитар швейцарский къайдайиинди гъухнийи. Мягьямед 15 йис яш айи баярин дестейиз гъадагъну.
Пуз ккундузузки, Мягьямеддиз мектебдиъ шахматариан аьлава дарсар киврайи Зиявудин Хайирбеговди ва жара мялимари гизаф кюмекар апIури шулу, гьацира сикин дарди дугъу интернетдиан онлайн-талитар гъахура. Ич мектебдиъ Мягьямедси шахматариан хъуркьувалар гъадагъурайи бицIидар хъана а. Думу мектебдиъ ккебгъбан классариз ва шахматариан аьлава дарсар киврайи мялим Зиявудин Хайирбеговдин хъуркьувал ву», – гъапнийи Ризван Мукаиловди.
Мягьямедди ич сюгьбатнаъ талитарин гьякьнаан чан фикрар ва шахматарихьна вуйи аьшкь ачухъ гъапIнийи.
«Узу райондиъ шахматариан сабпи йишв гъадабгъган, Дагъустандин талитариз гьаънийзу. Дюзди кIурза, думу турнириъ ужуб гьязурвал айи шахматистар иштирак гъахьнийи. Мягьячгъалайиан вуйи Мягьямед Мягьямедовдихъди вуйи уйнамишар гъагъидар гъахьунзуз. Дугъахъди швейцарский къайдайиъди шубубпи туриъ гюрюшмиш гъахьунза. Гизаф бажаранлу шахматист ву. Хъа ноябрин вазли гъахьи СКФО-йин турнирикан кIуруш, думу йиз кIваъ гьамусра ами. Душваъ сабпи хьуб партияйиъ узу варитIан улихь хьайза, хъасин аьлава вуди иливу вахтнан натижйири узу кьюбпи йишваз илдитну», – къайд апIура ихь шахматистди.
Дугъриданна, Мягьямед чан таярин арайиъ варитIан ужур шахматист гьисаб дапIна. Магьа гьаму йигъари гъахьи Дагъустандин кубокдин талитарин сабпи йирхьуб туриъ думу вари шахматистарин улихь гьудучIвну. Дурарин гьисабнаъ турнириз ужуйи гьязур духьнайидар, улихьна йисари Дагъустандин ва СКФО-йин талитарин гъалибчйирра айи. Натижайиъ, турнириъ улупнайи 7 балликан 6,5 балл гъадагъбиинди, Мягьямед сабпи йишван сагьиб гъахьну ва сабпи дережайин дипломдиинди, Дагъустандин кубокдиинди ва медалиинди лишанлу гъапIну.
Гьамусяаьт ихь живан шахматист февралин вазли аьхюдарин арайиъ гъягъру шахматарин Дагъустандин ва багарихьди шлу Урусатдин финалин талитарихьна гьязур шула.
