Умгьанат Сулейманова
Улихьнаси Москва шагьриъ «Атомный станцйириъ электрик ва манишнан энергия гьясил апIру Урусатдин концерн» АО-йин департаментдин директор Исамутдин Исабегович Гьюсенбеговдиз Урусатдин Федерацияйин Президентдин къарарниинди, «Ватандин улихь гъазанмиш дапIнайи гьунарариз лигну» кьюбпи дережайин ордендин медаль тувну. Дугъаз мициб заан пешкеш Урусатдин атомный циркил артмиш апIбак пай кивбаз ва гизаф йисари гъизигу намуслу зегьметназ лигну, тувнийи.
Исамутдин Гьюсенбегов-дин ляхнин хъуркьувалар ва гьацира 22-пи декабриъ къайд апIурайи электрикдин йигъ тебрик апIури, дугъкан газатдин машариъ сакьюдар мялуматар туврача.
Халкьдин мисал айиб ву, аьхю хизандиъ гъахьи баяр-шубар аькьюллу ва зигьимназ гъудуркьдар шулу кIури. Гьацдарикан ву пуз шулу ЧвулатI гъулаъ дуланмиш шулайи Гьюсенбеговарин хизанра. Исамутдин Гьюсенбегов 1971-пи йисан Табасаран райондин ЧвулатI гъулаъ аьхю албагу хизандиъ бабкан гъахьну. Дугъан адаш, Исабег Гьюсенбегович, хайлин йисари Табасаран райондиъ жюбежюр цирклариъ гъилиху кас ву, хъа дада, Фаизат хала, вафалу 10 велед тербияламиш гъапIу дишагьли ву. Дурари 3 бализ ва 7 шураз заан ва кьялан образование тувну.
Чпин хизандиъ Исамутдин Гьюсенбегов 4-пи велед ву. 1988-пи йисан мектеб ккудубукIну, думу Советарин армияйиз ватандаш’валин буржи тамам апIуз гъушну. Душваъ гъуллугъ апIуз хъюгъю йигъланмина, дугъу учв ужур пишекарси, дустси, багъри Ватандин лайикьлу ватанперверси улупну. Советарин Союздин ва Турцияйин сяргьятар уьрхюрайи кьушмариъ гъуллугъ апIурайиган, жара уьлкейин дазуйилан улдучIвурайи кас дисбаз лигну, Исамутдиндиз чан сабпи награда – «Улькейин сяргьятар ужуди уьрхбаз лигну» медаль – тувнийи.
Армияйин кьяляхъ думу Москвайиъ М.В. Ломоносовдин ччвурнахъ хъайи МГУ-йиъ юридический факультетдиъ урхуз учIвру.
Исамутдин Гьюсенбегов Урусатдин Федерацияйин жюрбежюр министерствйирин гъуллугъариъ гъилихну. Гьамусяаьт му лихурайи концерндиъ сумчIурна ургуд агъзур кас лихура. Хъа дурарин арайиъ ихь ватанагьлийирикан айир анжагъ сар Исамутдин Гьюсенбегов ву.
Исамутдин Гьюсенбегов-дикан яркьуди мялуматар учу улубкьурайи цIийи йисан, ихь бажаранлу ватанагьли Дагъустандиз гъафиган, дугъахъди гюрюшмиш духьну, бикIуз мясляаьт гъапIунча.
