Августдин 6-пи йигъан Урусатдин Федерацияйин юстицияйин министр Константин Чуйченкойин приказдиинди ихь ватанагьли, Хив райондин Заан Яракк гъулан вакил Къазимягьямад Сефикъурбанов РФ-дин Минюстдин Московский областдиъ айи Управлениейин начальникдин заместителди тяйин гъапIну.

Къ.Сефикъурбановди 2003-пи йисан Дагъустандин гьюкуматдин университетдин юридический факультет ккудубкIну, думу юридический илмарин кандидат ву. Хайлин йисари Дагъустан Республикайин юстицияйин министерствойиъ заан гъуллугъариъ лихури гъахьну.

Дагъустан Республикайиъ кIули гъубшу идара апIбан кадрйирин резервдин конкурсдин натижйириз дилигну, 2018-пи йисан Къазимягьямед Сефикъурбанов РД-йин кадрйирин резервдиз кьабул гъапIнийи. 2018-пи йисан сентябрин вазлилан 2022-пи йисан апрелизкьан гьадму РД-йин юстицияйин министерствойин кIулиъ гъилихну.

Илимдин 15 ляхнин ва гьадму гьисабнаъди саб монографияйин, ВАК-дин журналариъ чап гъапIу 5 макьалайин, урхбанна методикайин 5 пособиейин, лекцйирин курснан автор ву.
Гьюрматлу Къазимягьямед Сефикъурбанович! Учу, «Табасарандин нурар» газатдин редакцияйин коллективди, яв цIийи гъуллугъ мубарак апIури, увуз жандин мюгькам сагъвал, гьюкумат ва жямяаьт бадали гъабхурайи гъуллугънаъ хъана заан хъуркьувалар ккун апIура.