Зубайдат Шябанова
ЦIийи йис улубкьну кьюдпи йигълан ккебгъну, 10 йигъандин арайиъ Мягьячгъала шагьрин асас майдандиин машгьур артистари «ЦIийи йисахъди, Дагъустан» Сабпи фестиваль гъубхну. 11-пи январи гъабхьи аьхиримжи гала-концертдиъ узура айза. Сабпидарди сягьнайиина удучIву РФ-дин халкьдин яратмишарин лайикьлу коллектив, фольклоринна хореографияйин «Эхо гор» ансамблин лезгинка ялхъвни вари тамашачйир гьевеслу гъапIнийи.
Фестиваль гъябгъюрайи 10 йигъандин арайиъ шагьрин майдандиина 100 агъзуртIан артухъ шагьрин агьалйир ва хялар гъафну. Концертдин программа, дугъриданна, культурайин кюгьне аьдатар ва деврин цIийи кIалибар сатIи дапIну, дагъустандин халкьдин культурайин машквраз илтIибкIну.
Гала-концертдиъ РД-йин халкьдин художествойин сяняаьткарваларин ва туризмйин министр Эмин Мердановди ва Мягьячгъала шагьрин мэр Жамбулат Салавовди, фестивалин иштиракчйир къаршуламиш апIури, уч духьнайидар вари улубкьу ЦIийи йисахъди тебрик гъапIну.
«Гьаму фестиваль хъуркьувалиинди, гьамци шадди гъабхуб Дагъустандин глава Сергей Меликовдин, РД-йин правительствойин ва Мягьячгъала шагьрин администрацияйин сабишв’инди албагну гъапIу ляхнин натижа ву. РД-йин халкьдин художествойин сяняаьткарваларин ва туризмйин министр Эмин Мердановдиз, гьаму фестиваль тешкил апIбаъ гъизигу зегьметназ ва киву пайназ лигну, кIул’инди чухсагъул пуз ккундузуз.
Улубкьу йис Урусатдин сабвалин йис вуди мялум дапIна. Аьсрариинди уьрхюрайи аьдатари ва дуствали дагъустандин миллетарин арайиъ айи мюгькам ислягьвал субут апIура. Халкьарин сабвал – му закурин йигъак миж кайивал ву. Му инсанвалин заан лишнариз вафалувал гъи ихь эскрари хусуси метлеб айи дявдин операцияйиъ улупура. 18 Урусатдин Игитриинди ва агъзрариинди дирбаш эскрариинди дамагъ апIурахьа. Дурарин игитвал ва кьягьялвал ухьуз варидариз ватанпервервалин ва ляхниз вафалувалин дарс ву.
Гъи ухьу гьаму фестивалин натижйир йивурахьа. 2026-пи йис гьеле ккебгъритIан адар, ихь улихь гележегдин цIийи планар ва проектар хьа. Ухьу цци дурар хъуркьувалиинди кIулиз адагъуз зегьмет зигидихьа», – гъапну Жамбулат Салавовди.
Фестивалин сягьнайиина Марьям Къазиева, Аьбдулла Мирзакеримов, Зайнаб Махаева, Кристина Рамазанова, ПатIимат Расулова, Агьмад Аьгьмадов ва дагъустандин хайлин жара машгьур артистар удучIвну.
Вари тамашачйири ва артистари, фестиваль аьдатнаъ абхъру кIури, миж кивну.
