Гюльнара Мягьямедова

Ухьу цIийи йисандин машкврар къайд апIурайи вахтнара хусуси метлеб айи дявдин операцияйиъ ихь кьушмари женгар яваш дапIнадар. Ихь жигьилар гюлдин улихь дийигънайиган, ихь уьлкейиъ улихьнаси шадди машкврарра къайд гъапIундар. Вари халкь дявдин операция ккудубкIбаз ккилигура. Амма гьеле дидин аьхир рябкъюрадар.

 

США-йиъ президент ктагъбан сечкйириъ гъалиб духьнайи Дональд Трампди Мар-а-Лагойиъ кIули гъубшу пресс-конференцияйиъ Украинайиъ айи гъалмагъал 6 вазлин арайиъ дебккуз мумкинвалар агбакан гъапнийи. «Йирхьуб вазлин арайиъ РФ-дин ва Украинайин гъалмагъал дебккуз шул кIури, умуд кивраза», – гъапнийи думуган Дональд Трампди. Гьацира дугъу учв Урусатдин Президент Владимир Путиндихъди гюрюшмиш хьуз гьязур вуйиваликанра гъапнийи. Амма Трампдин гафариинди, думу ляхин инаугурацияйин кьяляхътIан шлуб дар.
Украинайиъ гъябгъюрайи хусуси метлеб айи дявдин операция дебккуз шлуваликан Трампди швнубна саб ражари дупна. Гьеле ккилигурхьа, 20-пи январин кьяляхъ фу шулуш.

Хъа гьеле Урусатдин Федерацияйин оборонайин министерствойи 2025-пи йисан 7-пи январиз туврайи мялуматариинди, Урусатдин яракьлу кьувватари Украинайин яракьлу кьувватарин военный аэродромарин яракьар айи складариз, гьацира техника гъварчди дебккнайи йишвариз ракетйириан йивбар гъапIну. Авиация, пилот адру тIирхру аппаратар, ракетйирин кьушмар ва артиллерия ишлетмиш апIури, Урусатдин Яракьтлу кьувватари 164 райондиъ операцйир кIули гъухну.
Оборонайин министерствойин улупбариинди, Урусатдин Федерацияйи Украинайиъ хусуси метлеб айи дявдин операция гъабхуз хъюгъхъанмина Украинайин 652 самолет, 283 вертолет, 39618 дрон ва зенитдин ракетйирин 590 комплекс, 20280 танк ва дявдин бронированный машинар дагъитмиш гъапIну.