Зубайдат Шябанова
Табасаран райондиъ Хючнаан ТIюрягъна вуйи рякъ багарихьди рас апIуз планарик ка. Думу Дагъавтодорин дахилнаъ айи Дербент-Хючна-Хив рякъюн саб пай ву.
Табасаран райондин агьалйири думу рякъ фила рас апIуруш, райондин главайихьан кми-кмиди гьерхри шулу.
Гьаму йигъари Мягьямед Къурбановди къайд гъапIганси, Табасаран райондин главади лихурайи дугъу хьуд йисандин арайиъ Дербентдиан Хючназ вуйи рякъ къайдайиз хубан бадали хайлин мумкинвалар гъагну.
«Думу рякъюн вари 44 километр манзилнакан 31 километриин цIийикIултIан асфальт улубзну. Гъубшу йисан подрядчик гъядягъбан серенжемар гъухнийча. Гьаму йисан подрядчикди Хючнаан ТIюрягъна гъябгъру рякъ рас апIбан проектаринна сметайин документар гьязур апIура. Думу рякъ, 7 километр манзил ади, Хючнаан Туруф гъулазди гьибицру йишв’инакьан хьибди.
Учу гьюкуматдин экспертизайин разивалин къарарин документ гъадабгъубси, сабпи 7 километр рякъ рас апIуз хъюгъюрча. Ляхнар гьяракатнаъ учIвубси, РД-йин транспортдин ва рякъярин мяишатдин министр Жанбулат Салавовдихъди ва Дагъавтодорин кIулиъ айи Рустам Закариевдихъди думу рякъ гьадлинтинара рас апIуб проектдик кипбан гьякьнаан йикьрар дапIнача, фицики думу рякъю Табасаран ва Хив районар сатIи апIура», – гъапнийи Табасаран райондин главайи.
Дупну ккундуки, думу рякъди Мягьячгъала шагьриз гъягъруган, Табасаран, Хив ва Агъул районарин агьалйириз саки 100 километркьан манзил кам шула. Гьаддиз му рякъ рас апIувалин месэла важиблударикан саб ву.
Му месэлайин гьякьнаан ич сюгьбатнаъ ТIюрягъ гъулан мектебдин директор Айнудин Кьасумовди гъапиганси, дугъриданна, дурарин гъулазди вуйи рякъ лапра гъагъи гьялнаъ а.
«Узу гьяфтайин хьуд лихру йигъарикан 2-3 йигъан ляхниан Хючназ гъягъюри шулза. ТIюргъян Хючназ 25-30 километр рякъ а. Рягъ лап гъагъи гьялнаъ а. Гьаддиз лигну, узу машин саки гьар гьяфтайи рас апIуз мажбур шулаза. Думу харжариз хайлин пул удубчIвуру. Узуси, ич гъулан, ничIрасарин, турфарин ва гьаму терефназди вуйи жара гъуларин машин айи хизанар гьадму гьялнаъ а.
Хъа машин адрудар, икибаштIан, чпин кIваин гъабхьи вахтна лихру, хусуси касарин маршруткйириъди гъягъюз мажбур шула. Чвлин, кьюрдун, хьадукран вазари рякъяр лапра гъагъи гьялнаъ гъахьиган, думу маршруткйир гьеле-меле лихурикьан шулдар.
Август вазли тIумтIар ккудутIру вахт гъюру. Ич гъулан хайлин агьалйир думу ляхнариин машгъул ву. Машинар хъаърудари тIумтIар ккудутIуз агьалйир хьади Хив терефнаанди, гъягъюб хайирлу вучуз, кIура, фицики душваъ рякъяр ужуб асфальт алидар ву.
«Чара адрури чинчарихъди уьл ипIуру» кIуруганси, 7 километр манзилра саб аьхю рякъ ву – гьадмукьан гъабхьнийиш, ужи шуйи. Мягьямед Сиражудиновичдиз чухсагъул, дугъриданна, рякъярин месэла гьял апIуз дугъу чарйир агура.
Мидланра гъайри, Мягьячгъалайиз гъягъруган, Хив райондин бязи гъуларин агьалйир, лезги гъулар ва Дербент гъирагъдиъ гъибтну, ич гъул’анмина, гьадабтIбахъди, таза рякъ дапIнайи КIежхиантина гъягъюри шулу. ИкибаштIан, рякъ ич гъулазкьан гъапIнийиш, ккундийчуз. Думу месэлара гьаму багарихьди гьял апIур кIури, умуд кивраза. Хъа гъи гьадму апIуз пландик кипнайибдизра чухсагъул», – гъапнийи Айнудин Кьасумовди.
