Гюлягьмад Маллялиев
Гьаму йигъари Табасаран райондин кIулиъ айи Мягьямед Къурбановди машгьур табасаран артист, композитор, ДАССР-ин культурайин лайикьлу гъуллугъчи Агьмад Уружевдиз Хючна гъулаъ, райондин Культурайин хуларин улихь ядигар дивуз ккайиваликан хабар тувну. Му хабриз ккилигурайидар райондиъ гизафдар айи, фицики Агьмед Уружевди чан мяълийириинди багъри гъул ва Табасаран машгьур гъапIну, дидланра савайи дугъу табасаран халкьдин мяълийирин культура артмиш апIбак аьхю пай кивну.
ЦIийи хабрихъди тебрик апIури, узу Хючна гъулан агьали, Аьгьмед Уружевдин кюгьне дуст ва дугъаз ядигар дивбан жягьтлувал хьади удучIву Тажудин Мягьрамовдихьна илтIикIунза.
– Чухсагъул, Гюлягьмад. Дугъриданра, хабар дюзиб ва гизаф рази апIруб ву. Учу, ихь машгьур артист ва Хючна гъулан дамагъ Агьмед Уружевдин сурат зигбан ва ядигариз эскизар гьязур апIбан бадали, ихь ватанагьли, художник Аьбдулягьяд Гьясанов жалб гъапIунча. Думу му месэлайин гьякьнаан Мягьямед Сиражудиновичдихъди гюрюшмишра гъахьнийи, ва художникди бюстдин ва ядигарин саб-швнуб эскиз гьязур гъапIнийи. Дурарикан саб эскиз Табасаран райондин депутатарин собраниейин сессияйиъ тасдикь гъапIнийи. Райондин бюджетдиан ядигар гьязур апIуз лазим вуйи дакьатарра деетна. Гьамусяаьт Аьбдулягьяд Гьясановди Мягьячгъалайиъ жюрбежюр скульпторарихъди бюст гьязур апIбан бадали гафар-чIалар апIура. Тендер кIули дубхну, гъалибчи мялум гъахьиган, дугъахъди йикьрар йитIиди.
Узуз райондин главайи гъапиганси, Аьгьмед Уружевдиз ядигар Табасаран райондин юбилейин серенжемарин дахилнаъди ачмиш апIбанди ву. Гьаддихъди сабси, Культурайин хуларизра Агьмед Уружевдин ччвур тувбанди ву. Райсобраниейин депутатари тялукь къарарра адабгъну», – ктибтнийи Тажудин Мягьрамовди.
«Му ляхин ухдитIан дапIну ккуниб вуйи. Хъа гьамусра кьан дар. Умудлу вуза, ихь ватанагьли Агьмед Уружевдин рюгьяр рази хьиди. Му ляхин кIули адабгъбак пай киву вари инсанариз кIваантIан чухсагъул кIураза, гьадму гьисабнаан «Табасарандин нурарин» редакцияйизра, гьаз гъапиш газатдин машариъ ва сайтдиъ гьаму месэлайиз бахш вуйи саб-швнуб материал удубчIвну», – аьлава гъапIнийи йиз сюгьбатчийи.
