Мейлан Нежефов

15-пи апрели Хив райондин депутатарин собраниейин сумчIурна сабпи сессия кIули гъубшнийи. Нубатнан сессияйин йигъандин повесткайиъ райондин глава ктагъбан сечкйирин месэла дивнайи.

 

КIваин апIуз ккундучуз: муниципалитетдин главади лихурайи Ярмет Ярметовдин къанундиъ улупнайи хьуд йисандин муддат аьхирихъна гъафнийи. Гьаддихъди сабси, 18-пи мартдиан 4-пи апрелизкьан райондин главайин кандидатурйир диврайи касарин документар кьабул гъапIнийи. Хъа йирхьур касдикан (шубур – райондин агьалйирикан, шубурсана республикайин меркездиан) ибарат вуйи комиссияйин членари 5-пи апрелихъанмина дурар ахтармиш апIуз хъюгънийи.

Хьуд йис улихьна Хив райондин главайин гъуллугъниина кандидатура дивнайидарин кьадарнахь тевиган, му ражари дурарин кьадар ургуб ражари цIиб вуйи – анжагъ шубур кас. Гьадрарикан, конкурсдиз вуйи документар гъалатI ктарди гьязур дапIнаш ахтармиш апIбалан кьяляхъ, комиссияйихъди сюгьбатназ ва тестированиейихьна кьюр кас деетнийи.
Баллариан улихь хьайир муниципалитетдин главади лихурайи Ярмет Ярметов вуйи. Гьаддиз сессия кIули гъабхурайи депутатарин корпусдин председатель Садикь Исрафиловди, сесер тувбан бадали, сифте дугъан кандидатура арайиз адабгънийи. СумчIурна сар депутатди чпин сесер тувбиинди Ярмет Ярметов сабсан муддатназ главади ктагънийи.
Чаин ихтибарвал дапIну, чахъанди сес туву гьарсар депутатдиз Ярмет Ярметовди чухсагъул мялум гъапIнийи. «Гаф тувраза, райондин ва агьалйирин гъайгъушнаъ ади, ухьу гьелелиг хътруркьу ляхнар-карар баркаллагьниинди гъийин йигъхъанмина давам апIури, кIули адагъуз», – гъапнийи главайи.

«Табасарандин нурар» газатдин коллективди, Ярмет Ярметов тебрик апIури, дугъаз жвуван халкь бадали вуйи зегьметнаъ заан хъуркьувалар ва жандин сагъвал ккун апIура.