Наргиз Гюлечова
Дадайин уьмриъ варитIан аьхю йишв чан веледари бисура. Велед наан ашра, дадайин юкIв гьаммишан дугъхъанди убгурайиб ву. Хъа гъи уьлкейиъ гъагъи аьгьвалат арайиз дуфнайиган, чпин веледар дявдин женгариъ иштирак шулайи дадйирин юкIвар фициб гьялнаъ айкIан?

 

Улихьна йигъари Казбе-ковский райондин Дубки гъул’ан вуйи Хабизат Дадаева, хулаъ айи чан байра хъади, Украинайин аьтрафариина гъушну. Дина гъягъбан метлеб – хусуси метлеб айи дявдин операцияйиъ иштирак шулайи чан аьхюну бай Расулиин улукьуб вуйи. Къайд дапIну ккундуки, Хабизат Дадаева, СВО-йиз жвуван велед рякъюз гъушу дадйирикан сарпир ву.

Хъа фила гъабхьиб вухъа, дада веледдихьна ичIи хилди гъягъювал? Аьдат вуйиганси, Хабизат Дадаевайира чан бализ ва дугъан дявдин юлдшариз хул’ан итIру сурсатар – ккахьнайи банкар, гъеебццу йикк, хулаъ гьязур дапIнайи дулдурма – ва хъанара жара шей’арра гъахну. Расулиз чахьна дада гъюрайибдикан хабар адайи, ва Украинайин жилариин дада гъяркъиган, думу гизаф мюгьтал шулу. Расулин дада гъювал, дугъазси, дугъан дявдин юлдшаризра аьхю машквар гъабхьну.

Хабизат Дадаевайи, учв дуфну имиди, ихь эскрариз авар хинкIар ва жара хурагар гьязур дапIну, гьивну. Расулин ва дугъан юлдшарин разивалин кьадар адайи. Дявдиъ дадайин хилариинди гьязур гъапIу хурагар итIуз гьар йигъан шулайинхъа?