Гюльнара Мягьямедова
Гьаму гъябгъюрайи 2026-пи йисан Дагъустандиъ дада хьуз гьязур шулайи 70 агъзуртIан артухъ дишагьлйириз сабвуйи пособие гъюра. Думу фици дюз апIуруш ва шлиз рубкьуруш, исихъ ктибтурача.

Гьюкуматдин терефнаан кюмек гъадабгъбан бадали, дада хьуз гьязур шулайи дишагьли 12-пи гьяфта хьайиз медицинайин тешкилатдиъ гьисабнаъ дийигъну ккунду. Дидин гьякьнаан РД-йин ОСФР-ин мялуматарин гъуллугъну хабар тувра.
Пулин кюмек тувруган, хизандиз гъюрайи гъазанж ва айи хусуси мутму гьисабназ гъадабгъуру. 2026-пи йисан пособие гъадабгъбан бадали, Дагъустандиъ гъадабгъурайи гъазанж хизандин гьарсарин кIулихъ 17 234 манаттIан артухъ дубхьну ккундар. Пособиейин кьадар хизандин гъазанждикан асиллу ву, ва Дагъустандиъ яшамиш хьпан бадали чарасуз вуйи кьадарнан 50% – 9 392 манат, 75% – 14 089 манат ва 100% – 18 785 манат ву.
Пул медицинайин тешкилатдин гьисабнаъ дийигъу вазлихъанмина (бицIир киршну 6 гьяфтатIан ухди дарди) ва бицIир бабкан хьайизкьан гьар вазли гъюру. Пул гъюри гъубзбан бадали дишагьли 10-14-пи, 18-22-пи ва 30-32-пи гьяфтйири духтрихьна гъягъюри ккунду. Эгер духтрихьна гъягъру вахт ккадапIиш, кюмек тувувал дебккру.
Аьрза «Госуслуги»-йин порталиъ, Дагъустандиъ айи СФР-ин клиентарин гъуллугънан отделениейиъ, ясана МФЦ-йиъ тувуз шулу.
КIваина хурача, 2026-пи йисан 1-пи январихъанмина хизандин ляхин удукьру гьарсар члендин гъазанж 12 вазлин арайиъ 8 МРОТ-тIан, яна 216 744 манаттIан цIибди дарди ккунду.
Гьацира 2026-пи йисан 1-пи мартдихъан башламиш дапIну, пособие дюз апIруган гьисабназ гъадабгъру варитIан цIиб вуйи алиментарин кьадар региондиъ туврайи кьялан маважибдин гьисабнаан гъадабгъура (2024-пи йисан Росстатдин улупбариинди, Дагъустандиъ кьялан маважиб 43 236 манат ву). Эгер абйир-бабари алиментарин кьадар суддиъ улупундарш, Дагъустандин СФР-и аьрзайиъ улупнайи кьадар гьисаб апIуру ва думу республикайиъ улупнайибтIан цIибди вуш, хизандин гъазанждин дахилназ республикайиъ кьялан маважибдин бинайиинди гьисаб дапIнайи алиментарра гъадагъура.
Эгер ичв хъана жара суалар гъузнаш, аьлакьайин центриз (ЕКЦ) илтIикIай, телефондин номер: 8(800) 100 00-01 (зенг чIанади ву).