Наргиз Гюлечова

11-пи октябриъ Каспийск шагьриъ айи Аьли Аьлиевдин ччвурнахъ хъайи спорткомплексдиъ «ДагАгро-2023» гъулан мяишатдин выставка кIули гъубшну. Му серенжем республикайин гъулан мяишатдин ва ипIру-убхъру сурсатарин министерствойина «Дагъустандин теплицйир» илимдинна гьясиллувалин ассоциацияйи сатIиди тешкил гъапIуб ву. Выставкайиъ Урусатдин 80 регионариан ва гъунши харажи уьлкйириан теплицйириз лазим вуйи сурсатарихъди ляхин апIурайи карханйир иштирак гъахьну.

Гъулан мяишатдиз мяналу серенжем ачмиш апIбан асас пайнаъ республикайин гъулан мяишатдин ва ипIру-убхъру сурсатарин министрин сарпи заместитель Шарип Шарипов иштирак гъахьну. Дугъу къайд гъапIганси, республикайин гъулан мяишатдин цирклиъ ишлетмиш апIурайи гьаму деврин технологйир йислан-йисаз цIийи алаура. Гьаддихъди сабси, циркил мянфяаьтлуди артмиш апIуз инновацйирин проектарра кечирмиш апIура. Ва гьаму жюрейин серенжемар гъахбиинди, уртахъди ляхин апIбан бадали, хайлин мяишатариз чиб-чпихъди йикьрарра йитIуз мумкинвалра шула.