Зубайдат Шябанова,
Айгуль Мягьямедова
Дагъустандиъ учIру вирусдин инфекцйирихъди аьлакьалу вуди 12 бицIидарин багъ ва 14 мектеб саб гьяфтайиз хъяркьну. Дурар БежтIайин участокдин, Буйнагъск, Гуниб, БутIлих районарин ва Буйнагъск шагьрин аьтрафариин алидар ву.
Дагъустандиъ учIру инфекцйирин вирусарин тарагъру уьзрариан аьзарлу шулайидарин кьадар гъубшу гьяфтайиътIан 15 процент за гъабхьну. 11-пи мартдиз вуйи улупбариинди, республикайиъ 3 386 дюшюш гьисабназ гъадагъна, дурарикан 60% –гриппдин вирусариан, 40% – гриппдин дару жара вирусариан аьзарлу дахьнайидар ву.
«Гъи йиз шуран классдиъ айи 18 урхурайирикан дарсариз дуфнайидар 6 кас ву. Вари гриппдин вирусдиан иццру духьна. Йиз ришра иццру шулу кIури гучIурарзуз. Закур гьаъруш вая хулаъ гъитруш, фикрарикк ккахъназу», – бикIура абйир-бабарин чатдиъ Дагъустандин Огни шагьриан вуйи сар дишагьлийи.
Гьаму фикрарикк гъи хайлин абйир-бабар ккахьна.
Месэла сабхилди гьял дапIну ккунду
Ухьу, аьхю насил, лазим вуйи вари привикйир дапIнайидар вухьа. Гъийин деврин инсанар думу месэлайихьна жараси лигура. Республикайиъ бицIидариз сарикан тмунурикна тарагъру уьзрарихьан уьрхру прививкйир йивуб сагъламвал уьбхбан цирклин гьял апIуз гъагъи месэла дубхьна
Дагъустан Республикайин вице-премьер Аьбдурягьман Мягьмудовди РД-йиъ бицIидарин арайиъ сарикан тмунурикна тарагъру уьзрарин профилактика гъабхбан рубар йивбан тешкиллувализ бахш дапIнайи совещание кIули гъубхну. Дидин гьякьнаан региондин министрарин кабинетдин мялуматарин гъуллугънаан хабар тувра.
Совещаниейиъ Г.Н. Габри-чевскийин ччвурнахъ хъайи эпидемиологияйин ва микробиологияйин илимдин ахтармишар гъахру институт, Роспотребнадзорин вакилар, республикайин сагъламвалин министерствойин ва Роспотребнадзорин РД-йиъ айи Управлениейин кIулиъ айидар иштирак гъахьну.
Уч духьнайидари бицIи-дарин арайиъ вакцинайин кюмекниинди тарагъувал дебккуз шлу уьзрар ярхла апIбан важиблу месэлйир гьял гъапIнийи. Уьзрар тарагъбахъди арайиз дуфнайи аьгьвалат ужувлахъинди дигиш апIбан бадали, федеральный центриан дуфнайи вакилари региондиъ профилактикайин уьлчмйир кьабул апIбан теклифар дивну.
Аьбдурягьман Мягьму-довди гьацира республикайиъ гриппдихъди ва сарикан тмунурикна тарагъру жара уьзрарихъди аьлакьалу вуди, гъагъи гьял арайиз дуфнайивалра къайд гъапIну. РД-йин вице-премьери сарикан тмунурикна тарагъру уьзрариан бицIидар йихувалин швнуб-саб дюшюш кIваин гъапIнийи.
Совещаниейин аьхириъ Аьбдурягьман Мягьмудовди къайд гъапIганси, Дагъу-стандиъ сагъламвал уьбхбан цирклин улихь дийигънайи месэлйир мянфяаьтлуди гьял апIбаъ медицинайин вари тешкилатар иштирак духьну ккунду.
Аммаки, жямяаьтлугъ иштирак дархьиди, думу месэла гьял апIуз хьибдар.
Гъаршувалин себеб фу ву?
Советарин Союздин вахтна гъяламарин гьякьнаан абйир-бабарихьан гьерхри шулдайи. Мектебдиз, бицIидарин багъдиз гъулан фельдшер дуфну, аьзарлуди айириз сагъ хьайиз вахт тувуйи, имбу вари бицIидариз нубатнахъди рубар йивуйи.
«Узу духтрарихъ хъугърайир, дурари кIуруб апIрур вуза. Духтрарин теклифниинди, улихьна йисариси, гъубшу йисанра 2-пи классдиъ айи йиз бицIириз гъялам гъивнийи. Дугъан классдиъ урхурайидарин имбуну абйир-бабари чпин бицIидариз гъяламар йивуз ихтияр тувундайи, гьаддиз йиз бай ва гьадмуси гъялам гъапIу жара бицIидар имбударихьан жара дапIну ккундийи. Дурариз жара мялим, жара класс ва жара гьяжатхана улупнийи. Йиз бай чпиз улупнайи мялимдихьна гъягъюз рази гъахьундайи. Кьюб вазлин арайиъ дугъу, мектебдиз дурушди, дарсар манзилнаъди урхури имийи. Думу жюрейиинди дарсар урхуб читин ву, узура кьюб вазли, ляхниз дурушди, хулаъ дусну гъузну ккунду. Эгер гьаму йисанра гьациб гъялам апIуб тIалаб гъапIиш, узу разивал тувидарза. Гьюкуматди прививкйир апIбан къайда дючIюбгъна», – ктибтура Аьгьмаддин дада Сабинайи.
Магьа гьамци, бицIир иццру гъахьиган, вари духтрарихьна жаргъурахьа, хъа духтрари диврайи теклифар кьабул апIурадархьа. Натижайиъ мектебари карантинар дивра.
