Наргиз Гюлечова

Гьаму йисандин аьхирариз Сбербанкди исламдин банкингдин проектдин дахилнаъди Дагъустан ва Чечен республикйириъ сабпи офисар ачмиш апIуз планламиш дапIна. Му мялумат банкдин аьхюну вице-президент Олег Ганеевди тувну.

 

Дугъан гафариинди, Урусатдиъ исламдин банкинг артмиш апIбан бадали, дидихъди аьлакьалу вуди алахьурайи читин мэселйир Сбербанкди 2016-пи йисхъанмина гьял апIури а.
Къайд апIуб лазим вуки, шариаьтдин къанундиинди вуйи банкинг, процентариз пул тутруври, хъа ислам диндин къайдйириинди, янаки, вахт улупну, буржназ пул туври, лизингдиинди ва фу-вушра саб апIурайи ляхник пулин пай кивбиинди либхурайиб ву.

Исламдин банкинг гьякьнаан улихьнаси журналистарихъди пресс-конференцияйиъ Дагъустан Респуб-ликайин предпринимательствойинна инвестицйирин Агентствойин вакилари – Мария Жамалутдиновайи ва Мягьямед Юнусовди Дагъустандиъ шариаьтдин банкдин артмиш’валикан ва проектди фици ляхин апIуруш кIули гъуху ахтармишарин натижйирикан ктибтну. Къайд апIуб лазим вуки, Урусатдиъ исламдин банкингди фици ляхин апIуруш ахтармиш апIуб сесеб вуди, му проект ккудубшу йисан 1-пи сентябриъ Дагъустандиъ, Чечняйиъ, Башкирияйиъ ва Татарстандиъ башламиш гъапIну.

Мягьямед Юнусовдин гафариинди, ислам диндин къайдйириинди ляхин апIуз хъюгърайи шариаьтдин банкингди айи къанундиз аьксивал туврадар. Асас вуди шариаьтдин къанундин бинайиинди уьмриз кечирмиш апIурайи думу проект ихь республикайиъ чарасуз лазим ву.